TBL hneh ngei kan tum - Tuikual Coach

Mizoram Super League season hmasa finalist Tuikual South-in kuminah beisei angin an la khel chhuak lo, zanin dar 6:30 hian Khatla TBL an hmachhawn dawn. Phengphehlep coach C. Lalrohlua chuan hnehna chan ngei an tum thu a sawi.

Tuikual hian match thum an khelh tawh vawi khat chiah hnehna an chang; Chawnpui hnehin Zarkawt BCA leh Ramhlun Sporting Club an hneh lo, point li hmuin palina an ni - a hniam ber Chawnpui nen an point neih zat a intluk avangin an dinhmun a ṭha lo.

Phengphehlep coach C. Lalrohlua chuan, "Midang result ngaihchan tel ngai loa semifinal khelh theih kan duh a, chumi tur chuan TBL hneh hi a pawimawh, chak ngei tumin kan khel dawn a ni," tiin Vanglaini a hrilh. Marova chuan sawi zawmin, "Ramhlun kan hmachhawn ṭum khan Darrel Bowie khan training nei mumal hman loin a khel a, tun ṭumah chuan inbuatsaihna hun a ngah tawh avangin a ṭhat leh zual ka beisei," a ti. American tlangval hian RSC lakah khan double-double (30pts, 15rebs) nei mah se a team a chakpui zo lo.

TSBC-in Khatla TBL hneh an tum a, an thil tum hi awlsam taka tih theih a ni dawn lo. MSL vawi hnih champion tawh hi champion lai Zarkawt BCA lakah an che sual zauh tih mai loh chu an khel ṭha thei hle. TBL coach Lalrinzuala chuan, "Captain H. Laldinsinga kha chawn na vangin BCA lakah kan chhawr thei lo a ni a, tun ṭumah erawh a inkhel thei tawh ang," tiin India tana khel tawh Mapuia chungchang a sawi a, an khingpui tur Tuikual South chu chetsual theihna an nih avangin an fimkhur tur thu a sawi bawk.