Euro khel lo tur Ibra

Virgil van Dijk hnuah player langsar dangin European championship an khel dawn lo tih a chiang leh ta - Sweden striker Zlatan Ibrahimovic chu a khup hliam vanga a inlan loh tur thu tihchian a ni.

Kum 39 mi striker hian Euro 2016 zawh khan ram tan inkhelh a lo chawlhsan tawh a, mahse, kuminah ram tana a lo kir leh tur thu sawiin March thla khan World Cup qualifier khel tur Sweden squad-ah an ko nghal.

World Cup qualifier-ah hian Georgia (1-0) leh Kosovo (3-0) an hnehna inkhelah a inlan ve ve a, Georgia laka Viktor Claesson-a goal khung awmchhun chu a siamsak a ni.

Mahse, May 9 khan Serie A-a AC Milan-in 3-0 a Juventus an hneh ṭumin Zlatan hi hliam vangin lakchhuah a ni a, tunah chuan Euro-a khelh theih loh tur thu tihchian a ni ta.

Sweden national team chuan twitter lamah Euro khel tura an striker an hruai theih loh tur thu hi an puang a, Zlatan hian national coach Janne Andersson hnenah a hliam a dam hman loh tur thu hi a hrilh niin an tarlang.

Ram tan match 118-a khelha goal 62 khunga Sweden tana khung hnem ber ni mek Ibra hian tun season-ah Milan tan inelna hrang hrangah match 27 khelin goal 17 ngawt a khungsak a, vawi thum assist a nei bawk.

European top flight football-a goal a la khung dan ngaihtuahin Ibra hi ram tana inlan turin a la ṭha tawk tih a lang a, chutih rual chuan hliamin a tihbuai ve tak fo avangin regular taka inlan reng tur chuan a kumin a tlin ta bik lo niin a lang.