Aguero thlaktu tur Torres?

Manchester City-in transfer bazarah season tawp ruala chhuak tur Sergio Aguero thlakna tur an zawng mek a, amaherawhchu Argentine striker thlakna tur hi an kawl sa reng thei bawk.

Zirtawpni zan khan Manchester City-in St James Park-ah Newcastle United 4-3 in an hneh a, Ferran Torres-a'n hattrick a siam. Nikum nipui bazara Valencia aṭanga pound maktaduai 20.87-a Man City zawmtu hian striker position-a khel turin theihna a nei.

Newcastle United-in Man City lakah Emil Krafth (25), Joelinton (45'+6') leh Joe Willock (62') te hmangin ṭum thum hma an hruai a, Premier League champion thar hian Joao Cancelo leh Ferran Torres-a hattrick hmangin an lehthal.

Kum 21 mi Torres goal thum hi 'striker goal' tia chhal theih vek a ni a, goal hmasa ber mawi zetin a kheng goal. Goal hnuhnung pahnihah Torres hi a awmna tur takah awm fuhin cross ball leh goal ban fuh hnua ball per chu rang takin a khung ve ve.

Man City manager Pep Guardiola chuan, "Premier League-a season khatnaah chuan a khung tam khawp mai. Goal hmaah a hriam a, striker-a chhawr dan ka ngaihtuah ang," tiin Torres a chungchang a sawi.

Spanish forward hian tun season Premier League-ah match 22 aṭangin goal sarih a khung a, inelna hrang hrangah match 34 khelin goal 13-a khung tawh.