Steven Gerrard-a'n league nomawi a chawi ve ta: Ranger55

Glasgow kawtthlera thuziak lar tak pakhat chu, "Steven Gerrard: Liverpool-ah legend a ni a, Glasgow-ah erawh pathian a ni," tih hi a ni a, Glasgow club Rangers fan-ten Liverpool fan-te atchilh rawn Stevie G hi an pathian ang hialah an ngai.

Football khawvelah fans tam takin player an ngaihsan zawngte chu 'God' leh 'King' tihtein an lo ko tawh ṭhin a, Rangers fan-ten kum 10 zet league nomawi an chawi tawh loh hnua league nomawi chawipuitu Gerrard an ngaisang hi a mak lo - March khan Scottish Premiership-ah an champion fel der tawh.

Inrinni zan khan Rangers-in tun season-a an league match hnuhnung ber an khel a, an mikhual Aberdeen chu 4-0 ngawtin an sawp - Joe Lewis chuan an lama a tih luh bakah Kemar Roofe-a'n goal hnih a khung a, Jermain Defoe chuan goal khat a thawh ve bawk.

Inkhel a tawp a, player-a nih laia league nomawi chawi lo Gerrard-a'n manager a nih hnuah a vawi khat nan league nomawi a chawi zui - Rangers fans tluk zetin Liverpool fans-in an lawmpui ang.

Invincible
League champion nih a harsa a, tlawm nei loa champion phei chu a harsa lehzual. Mahse, a vawi 55 nana Scottish Premiership champion Rangers hian tun season-a match 38 an khelhah tlawm an nei lo. Sawi nep duh tan pawh sawi nepna tur a vang hle.

Rangers hian vawi 32 ngawt an khingpui an hneh thei a, vawi ruk an inhnehtawkpui. Season tluanin Scottish club zingah league-a Rangers hneh thei an awm lo tihna a ni. Brendan Rodgers hoin Celtic hi 2016-17 season khan tlawm nei loin an champion a, anni hnua Scottish top flight league-a tlawm nei loa champion leh hmasa ber chu Rangers an ni.

Steven Gerrard-a enkawl team ropui lehzualna chu an elpui ber Celtic an nau en tlat hi a ni - tun season league-ah vawi li zet an intawng a, vawi khat an in draw tih loh chu an chak fai vek!

Hei mai hi a ni lo - match liah hian Rangers lamin goal riat ngawt an khung a, Celtic hian goal hnih bak an khung ve lo. Hetichung hian league-a Rangers hnaih bertu chu Celtic an la ni tho a, an inthlauhna erawh point 25 ngawt a ni thung.

Record & Celtic
Rangers ropuina belhchhahtu chu goal khung an thiam piahlama goal ven an thiam hi a ni a, match 38 chhungin goal 13 bak an chhuah lo - Celtic ( 1913-14) in kum 107 liam taa goal 14 lek chhuah chunga record an lo siam tawh chu an khum.

Kum 2005 khan Jose Mourinho enkawl Chelsea chuan goal 15 lek chhuah chungin league season an khar a, he British record hi Rangers hian an rawn khum tel nghal.

A la tawk lo cheu - match 38 aṭangin match 26-ah chiah goal an chhuah a, Scottish football season khata goal chhuahna match nei tlem ber ni turin Celtic (25) record an khum.

Gerrard-a team hian mahni muala league match 19 an khelhah tlawm an nei miah lo bawk a, Martin O'Neill hoa Celtic-in record an lo siam tawh chu an nihrual - point 102 nei chungin an champion a, an club chanchinah heti zat point nei chungin an la champion ngai lo.

Gerrard Ropuia

Steven Gerrard-a'n player a nih laiin Liverpool-a champion pui tam tawk lo a, Premier League nomawi a chawipui loh chu vawiin thlenga sawi hlawh a la ni reng.

Mahse, English midfielder ropui ṭhin hian mimal chawimawina dawn tam lamah chuan Premier League-a a vanglai hun a hmanpui zingah han awh ngawih ngawih tur a nei bik lo a, mimal chawimawina a dawn zozai ziak dawn ila hmunin min daih lo ang.

Manager a nih hnuah player-a nih laia a tih theih loh tiin league nomawi a chawi nghal a, chumi zuitu chu mimal chawimawina a ni - European club tam takte chil tiputtu Gerrard hian player a nih laia a career ropui tak hliahkhuh thei tur khawpin coaching-ah hmabak a nei êng.

Stevie G hian tun season bika Scottish Premiership manager of the month chawimawina vawi kua dawn theih aṭangin vawi li a dawng a, SPFL Premiership Manager of the Year-a thlan a nih bakah Scottish Football Writers' Association Manager of the Year-ah thlan a ni bawk.

"Tun hi ka chanchin sawi hun a ni lo a, club leh a hmachhawpte sawi hun a ni. Theihtawp kan chhuah chhunzawm ang a, hetah hian tawp mai kan tum lo ang. He hmunah hian ka hlim takzet. Rangers enkawl tur hian chhungkaw lamah thil kalsan ngai tam tak a awm ve a, mahse, ka duhkhawp ka la hmu lo. Hei aia ropui zawk hi ka la beisei a ni. Season hmasa uiawm taka kan khar dan khan indinthar turin min pui a, kan hrehawmna leh natnate kha min fuih phurtuah kan hmang.Pre-season aṭang khan ka player-te hian an theihna zawng zawng piahlam thlengin min hlan a ni. Ka player leh staff-te ka chhuang takzet. He club-in harsatna a tawh laiin koh ka ni a, a harsa hle. Hmachhawp dik tak neih a ngai a, thawhpui tur thlan thiam a ngai a, board aṭanga thlawpna ṭha hmu chunga theihtawp chhuah a ngai. Kum thum chhungin ni tin chu hna chu kan thawk a, he hlawhtlinna hi kan sual chhuak a nih hi". - Steven Gerrard, Rangers manager