Arsenal lei dilna an hnawl

Spotify hmu chhuaktu Daniel Ek chuan Arsenal lei a duh takzet tih a sawi a, club lei tuma a dilna chu hnawlsak a nih thu a sawi chhuak. Stan Kroenke te chhungkua chuan sum tam zawka lei dilna an hmu a nih pawhin hralh tumna an la nei lo niin a lang.

Arsenal ṭantu tam takin club neitu 'Kroenke' chhuak turin an duh a, tun hnaiah pawh stadium pawn lamah pungkhawmin American sumdawng hausa hi chhuak turin an nawr hial, mahse fans duh danin club a kal dawn rih lo.

Daniel Ek chuan, "Club lei dilna ka thehlut a, hetah hian fans lam inrawlh dan tur, aiawh an neih dan tur thlenga ziah lan a ni. Mahse, Kroenke chhungkua chuan pawisa an mamawh loh thu min lo hrilh.

"Tunah ka dilna an hnawl a ni a, mahse Gunners lei ka duhna erawh a la tawp lo. An thutlukna ka zahsak em em a, engtik niah emaw chuan lei theihna kawng a la inhawn ngei ka beisei," a ti.

Swedish billionaire hi Arsenal ṭantu a ni a, club lei a tum danah pawh ṭanpui tur a zawng thiam hle. Thierry Henry, Dennis Bergkamp leh Patrick Vieira te chu amah thlawptu zingah an tel a, an duhna hi tunah hlawhtling lo mah se beisei an la nei thei ang.