LewanG40Lski-a'n goal 40 a khung ta

Bundesliga champion Bayern Munich chu Inrinni zan khan SC Freiburg-in an mual Dreisamstadion-ah 2-2 in an chelh. Amaherawhchu Hansi Flick-a hote hian tum an hlen tawh a, result a pawimawh tawh lo - Robert Lewandowski-a'n Bundesliga-ah goal 40 a khung tlin tak avangin an hlim hle.

Bayern tan Lewy hian minute 26-naah penalty aṭangin goal hmahruai a khung a, tun season Bundesliga-a a goal 40-na chiah a nih avangin Bavarians coaching staff leh player-ten 'guard of honour' an pe.

Bavarians coaching staff-te leh substitute ho chu touchline sirarh an inlar a, a lehlamah player-te intlarin Lewandowski-a'n inngaitlawm takin ban pharin a tlan lut.

Freiburg tan Manuel Gulde-a'n minute 29-naah siphurh a sut a, Bavarians tan Leroy Sane-a'n minute 53-naah khung leh mah se Christian Gunter-a'n minute 81-naah mualneitu tan khung lehin 2-2 in inkhel a tawp.

Bayern legend Gerd Muller chuan 1971-72 season khan match 34 aṭangin goal 40 a khung a, kum 49 hnuah Lewy hian match 28 aṭangin record a nihrual a, record khum turin match khat a la nei bawk.

Lewy hian goal a khung zawh hian a jersey hnuaia Gerd Muller-a lem leh '4ever Gerd' tih inziahna kawr chu a pholang a, club legend chunga zahna a lantir vang hian ngainat a hlawh lehzual ang.

Kum 32 mi Lewandowski chuan, "Thil theih loa ka ngaih ṭhin ka ti hlawhtling a, Bayern chanchina sulhnu ka nei ve tur hi ka inchhuang a ni. Football ngainatuten an tu leh fate chanchin hrilh tur ka hnutchhiah a, Gerd Muller-a hnung ka zui thei hi ka lawm a ni," tiin a sawi.

Bundesliga inkhel dangah Champions League khelh tum zinga mi Eintracht Frankfurt-in relegate tawh Schalke 4-3 in an hneh lo a, palinaa awm Borussia tan result lawmawm a tling. German league-ah hian a hnuai pahnih an relegate nghal a, pathumna bik hian playoff an khel ṭhin. Tun season-ah relegation battle a la ngaihnawm hle.