Heat lakah Bucks an chungnung

NBA playoff lama intawng tur Milwaukee Bucks chu Miami Heat te chuan nimin zing khan regular season an khel a, team ṭha pahnih intawngah Bucks lamin 122-108 in hnehna an chang - playoff atan inrintawkna an neih phah ngei ang.

Most Valuable Player vawi hnih ni tawh Giannis Antetokounmpo-a'n Bucks tan point 15 bakah rebounds vawi kua a la a, ani bakah hian point 21 neitu Bryn Forbes leh Jrue Holiday (20 points) te an che ṭha bawk.

Team pahnih hian regular season atan khelh hmabak pakhat ve ve an la nei. Mahse, Eastern Conference-a an dinhmun erawh a danglam phah tawh dawn lo. Bucks hi pathumna an ni a, an hneh tak Heat hi parukna dinhmun luahtu an ni thung.

Inkhel dangah Los Angeles Lakers tan LeBron James a che ropui leh ta. James hian quarter hnuhnung ber an khelh laiin, minute khat chhung vel lekin point sarih a nei zawn thei a, an khingpui Indiana Pacers lakah NBA champion hi 122-115 in hnehna a chan pui.