Bagan chelh tumtu AFC

I League khelh mekah Mohun Bagan an kal fawr a, vawiin tlai dar 5:00-a Aizawl FC an hneh a nih chuan an champion dawn. Mariners hi season ṭanna match-ah Mizo club nen goal awm loin an inhnehtawk a, hemi hnu hian Churchill Brothers hneh lo chhunzawm mah se match thumna aṭanga insiamṭhain hmalam an pan.

Aizawl FC coach Standly Rosario chuan, "Kan mualah Bagan kan chelh thei a, Kolkata-ah kan hneh theih kan beisei. Real Kashmir lakah huaisen takin kan tho chhuak a, goal hnih kan chhuah hnuah 2-2 in kan inhnehtawk. Bagan nena kan inkhel turah pawh phurna nasa tak min pe ang," tiin Vanglaini a hrilh.

Standly hote hian match 14 aṭangin point 16 an hmu a, an hnuaiah Neroca leh Indian Arrows chauh an awm. India rawlthar ṭha rual awm khawmna Indian Arrows hi an tlak ve theih loh avangin Mizo club dinhmun a him lo a, Neroca

nena an inkar tizau turin Marines lakah point hlawhchhuah ngei a ṭul.

Aizawl FC hian Bagan zawh hian Punjab FC hmachhawn turin an zin chhuak leh a, chumi zawh chuan an mualah match li an khel dawn. Fixtures thlirin Standly-a hote hi relegate lo turin an dinhmun a ṭha hle. Nimin tlai khan East Bengal-in injury time-a Victor Perez Alonso penalty hmangin Real Kashmir 1-0 in an hneh. Inkhel boruak sang takah hian Real Kashmir player Danish Farooq Bhat chu first half-ah red card pek a ni a, hun tawp hma hretin Kallum Higginbotham (Kashmir) leh Edmund Lalrindika (East Bengal) te hnawh chhuah ve ve an ni.

March 8, Pathianni

Trau    1 - 0    Indian Arrows

TRA : Deepak Devrani 89'

Churchill Brothers    1 - 2    Gokulam Kerala

CCB : Lalkhawpuimawia 73'

GOK : Nathaniel Garcia 31'; Henry Kisekka 90+1'

Nimin Inkhel Result

Real Kashmir    0 - 1    East Bengal

EB : Victor Perez Alonso 90+5' (P)

Vawiin Inkhel Tur

Mohun Bagan    5:00 PM    Aizawl FC

Neroca    5:00 PM    Punjab FC