Inter hnehtu Juve an nung thar A tawp niah an chingfel dawn
Juventus chuan Italian champion Inter Milan 3-2 in an hneh a, Old Lady hian an nomawi hloh tawh mah se table-ah pangana dinhmun luahin season thara Champions League khelh an la beisei thei.
Inter an hneh avangin Juve hi palina an ni hman, mahse nimin tlai khan Napoli chuan Fiorentina 2-0 in an luhchhuah a, khelh zat inangah Gennaro Gattuso naute hian point khatin an hmu hnem zawk a, palina dinhmun aṭangin Andrea Pirlo naute an nek chhuak.
Turin club Juve hian an legaue match hnuhnung ber atan Bologna an lenchilh leh dawn a, an elpui Napoli hian Veron an mikhual thung ang - Juve tan UCL khel turin chak ngei ngei a tawk dawn lo, an chak a nih pawhin Napoli an chetsual tel a ngai tawh dawn.
Serie A aṭangin champion Inter Milan leh Atalanta te chu Champions League khel turin an tling chiang tawh, nizan khan AC Milan Cagliari an mikhual a, hnehna an chang a nih chuan a sang pali zinga tel turin an dinhmun a chiang bawk ang.
Juve an chak
Inrinni zan Allianz Stadium-a inkhelah Juve tan Cristiano Ronaldo-a'n goal hmahruai khungin Juan Cuadrado chuan goal hnih a neih belh. Inter tan Romelu Lukaku bakin a khung thei lo, defender Giorgio Chiellini chuan anmahni lamah a ti lut bawk a ni.
Juve hian minute 55-naah Rodrigo Bentancur chu yellow card pahnihna hmuh vangin an chan, hetih lai hian 2-1 in hma an hruai mek. Player kim loin hun rei tak khel mah se tlarhnung an chesual duh lo a, hun tawp dawnah Inter midfielder chu hnawh chhuah a ni ve bawk.
A tawp thlengin
Inter Milan lakah tlawm ni se chu Juventus mualphona a nasa zual ang. Player kim loa khel chungin Old Lady hian champion team an hneh avangin beiseina tlemte an la neih chu chhawm nun a ni a, a tawp thlengin an ṭang ang.
Juve manager Andrea Pirlo chuan, "Hun harsa karah pawh hnehna chan tuma kan beih tlat avangin point thum hlu tak kan hlawh chhuak. Tun ṭumah hian kan chak a ni satliah lo, beiseina kan chhem nung a ni. A tawp thlengin tha kan thlah dawn lo.
"Palina nih tum vang ngawr ngawra ṭang reng tur kan ni lo, keini chu a tawp thlenga bei ṭhin kan nih vang zawk a ni," a ti. Khelmual aṭanga a lak chhuah Ronaldo chu inkhelh zawh hmain dressing room lamah lut daih mah se buaina a awm loh thu a sawi bawk.
UCL khel tur
Inrinni zan inkhel dangah Atalanta chuan Genoa chu 4-3 in an hneh a, Gian Piero Gasperini kaihhruaina hnuaia hmasawn nasa tak Atalanta hi season thara Champions League khel turin an tling chiang ta.
Atalanta hian match 37 aṭangin point 78 an hmu a, Juventus aiin point rukin an sang zawk. Old Lady hian point hmuh hnem lamah la nihrual thei mah se Atalanta hian head-to-head an neih ṭhat zawk miau avangin an him chiang tawh.
An match hnuhnung ber atan Atalanta hian AC Milan an hmachhawn dawn, hnehna an chang a nih chuan pahnihna ni chungin season an khar ang - Italian football inelna sang bera season an hman ṭhat ber ṭum tawng thei dinhmunah an ding.
