West Ham tan UCL beiseina a tawp

Champions League khelh tum ngam West Ham chu Brighton & Hove Albion nen 1-1 in an inhnehtawk a, season hmang ṭha viau mah se Hammers tan season thara UCL khelh beiseina chu a thamral tluk a ni ta.

David Moyes-a naute hian Premier League match 36 an khelh aṭangin point 59 an hmu a, palina Chelsea an phak lohna chu point nga a ni - khelh hmabak pahnih chauh an nei tawh, pangana Liverpool leh Blues te an tlawm vek a nih ngawt loh chuan Hammers tan kawng a awm tawh lo.

A tawpah goal hnih
Inrinni zan Falmer Stadium-a inkhelah goal kan hmu har, hun tawp hma minute 84-ah goal hmahruai kan hmu chauh. Brighton striker Danny Welbeck-a'n West Ham goalkeeper Lukasz Fabianski paltlangin goal a khung a, chak pui theih tur a ni.

Mahse, Seagulls lawm chhung a rei lo. Goal an neih aṭanga minute thum hnu lekah an lamah a lut, defender ball tauh chhuah fuh tawk loh dawngtu Said Benrahma chuan box pawn aṭangin goal mawi a khung, a duhnaah tak a thlawh lut.

West Ham vanneih zan a ni lo, goal an chhuah hma hian Craig Dawson leh Tomas Soucek ten hun ṭha bik an neih an hlah a, goal pahnih luh inkarah pawh hun remchang an insiamsak thei, mahse nidanga an khung theihna remchang angah khan an hlah.

Beiseina thamral
Moyes kaihhruaina hnuaiah West Ham an kaltluang a, amaherawhchu tun hnaia Premier League an khelh hnuhnung pangaah ṭum khat chiah hnehna an chang, an hnuaia awm Tottenham leh Everton ten an khelh hmabakah hnehna an chan chuan an point hmuh zat an hmu thei tawh dawn.

West Ham manager Moyes chuan, "European football khelh theih ngei chu kan tum, chumi tur chuan kan dinhmun pawh a la ṭha tawk viau bawk," tiin UCL khel lo mah se Europa League tal a la beiseina hle.

Moyes chuan sawi zawmin, "Goal kan khung theih loh rei em avang khan ka lawm lo hman hle, mahse si khat kan phurh hnua kan sut leh thei erawh lawmna tur a ni," a ti. West Ham hian West Brom leh Southampton te an la hmachhawn leh ang.

Saints tan Tella
Inrinni zan inkhel dangah Southampton chuan tla chiang tawh Fulham chu 3-1 in an hneh. Saints tan hian Che Adams (27'), Nathan Tella (60'), leh Theo Walcott (82') ten goal khat ṭheuh an khung a, mikhual tana Fabio Carvalho (75') khungin awmzia a nei lo.

Southampton manager Ralph Hasenhuttl chuan, "Inhliam kan ngah em em a, tun dinhmunah chuan kan player zinga talent nei ṭha ber a ni," tiin kum 21 mi Tella a fak a, English midfielder hian khelmual a luh aṭanga minute hnih hnuah goal a khung.

Tella hi rawlthar beisei awm tak a ni a, mahse khup hliam vangin a khel tam tawk lo. Saints tan season kal laiah league match vawi ruk chu bul a ṭan tawh - Fulham lakah hian goal a khung bakah Walcott khung tur a siamsak avangin fak a hlawh hle.