Liverpool chhandamtu Alisson - goal a khung!

Pathianni zan Premier League inkhelah football mawina phochhuahin a awm a, Liverpool tan goalkeeper Alisson Becker chuan goal a khung - Ni e, i chhiar dik, Alisson-a'n West Brom lakah goal-a khung!

Season thara Champions League khelh tum Liverpool hian top four an beiseina chhi nung turin West Brom chu 2-1 in an hneh a, hnehna chang turin hun pek belha an keeper goal khung an mamawh thung.

Baggies tan Hal Robson-Kanu chuan rin loh takin goal hmahruai a khung a, Liverpool tan Mohamed Salah chuan si phurh a sut - mahse, Champions League khel tura an hmabak match thuma chak vek mamawh Reds-in minute 90 chhungin goal dang an khung tawh lo.

Hun pek belh minute ngana a ni tawh a, Liverpool hian corner an hlawh chhuak - Reds tan chance tawp a ni tawh. Goal lamah Alisson-a rawn tlan phei a, Trent Alexander-Arnold-a corner aṭanga ball kal chu mawi zetin a tauh lut a, world class goal a ni.

Rin loh lamah
Liverpool-in Manchester United chu Old Trafford-ah 4-2 in an hneh a, an hmabak match-a an tum turte hi tla tawh West Brom, Burnley leh Crystal Palace an nih avangin an hmabak a huphurhawm hran lo.

Baggies lakah pawh Reds hi awlsam taka chak mai tura ngaih an ni a, mahse, beisei loh thil a thleng - December 2017 hnua a vawi khat nana Premier League inkhela bul ṭantu Hal Robson-Kanu chuan minute 15-na lekah goal hmahruai a khung.

West Brom goal khung danah Liverpool tlarhnung chu dem tur an ni a, Matheus Pereira 'pass' leh Kanu-a finishing tawihin fak phu mah se Reds tlarhnung dem loh an harsa.

Hriat tel tur erawh centre back-a inkawp Nat Phillips leh Rhys Williams-te hian tawnhriat an la nei tam lo dun hle - Nat hian season hmasa kha loan-in German second division-ah VfB Stuttgart tan a khel a, Rhys phei chuan English sixth division club Kidderminster Harriers tan a khel!

Salah bawk chu!
Season thara Championship khel tur Baggies lakah chak mamawh Liverpool an hnufual a, mual sira Jurgen Klopp hmel enin a hlim lo tih hrilh nawn kan ngai lo.

Liverpool-in na takin an nawr chhunzawm a, an beisei ang goal erawh an hmu thei lawk lo. Minute 33-naah Salah a rawn lang ta nge nge a, Egyptian forward hian Sadio Mane siamsak chu goal sirah mawi zetin a thlawh lut.

Salah goal khung hi tun season Premier League-a goal 22-a khungna chiah a ni a, Tottenham Hotspur striker Harry Kane nen an goal khung zat a inang - top scorer ni turin an inum mek.

Kum 28 mi Salah hian tun season inelna hrang hrangah match 49 khelin goal 31-a khung tling ta a, assist vawi nga a nei bawk - Liverpool tan a ṭangkaizia kan hmuh chhunzawm zel.

A tawpah Alisson
First half-ah Salah a hmuhnawm a, second half-ah erawh Baggies lamin an ven uluk avangin a che hleithei lo. Man United laka bul a ṭan loh vanga titau Sadio Mane-a'n bul a ṭan tawh a, danglamna erawh a thlen thei lo.

Mane hian danglamna a thlen thei lo mai ni loin uiawm taka hlah a nei nual a, chance ṭha khawhraltu a ni. Liverpool tana captain armband hrengtu Roberto Firmino pawh hmuh tur awm ṭhin mah se goal-a khung thei bik lo a, woodwork-a pet perte kha uiawm tak a ni.

Minute 90-a liam a, Liverpool-in goal an khung thei chuang lo. 1-1 in inkhel tawp ta se season thara Champions League khel tura an dinhmun chu an kutah a innghat lo zui ang. Referee-in minute li a pek belh a, beiseina chhete a la awm.

Hun pek belh minute ngana a ni tawh - Liverpool-in corner an hmu a, vengtu nei lo Alisson-a'n a tauh lut! Van lam kawk chungin a goal khung a lawm zui a, he keeper vang hian Liverpool-in Champions League beiseina an neih chhunzawm zel.

Inkhel Chhehvel
• Christian Benteke vs Crystal Palace - March 2016 (95:10) hnua Liverpool tana hun tawp lama goal khung tlai ber chu Alisson (94:18) kha a ni a, Premier League keeper zinga goal tauh lut thei hmasa ber a ni bawk.
• Liverpool-in Premier League-a an match hnuhnung pariat aṭangin vawi rukah hnehna an chang ta a, vawi hnih an khingpui an draw. Hemi hmaa an league match hnuhnung 19-ah khan vawi ruk chiah an chak a, vawi nga draw neiin vawi riat an tlawm.
• Salah-a'n tun season-ah league goal 22-a khung tling ta a, a goal khung hian Reds tan point 16 a hlawhchhuahpui tawh a, tun season-ah ani aia team tana an goal khung hmanga point hlawh chhuak hnem player an awm lo.
• Salah goal kha Reds tana a goal 125-na a ni a, 2017-18 season-a Liverpool-a zawm hnuah ani aia inelna hrang hranga goal khung hnem hi Premier League-ah an awm lo a, European top five league aṭangin hetih chhunga ani aia khung hnem chu player pali chiah an awm.
• Liverpool midfielder Thiago-a'n open play aṭangin a ṭhiante tan vawi nga ngawt goal khungna chance a siamsak a, December 2015 (for Bayern Munich vs Hannover 96) khan heti zat tho hi open play aṭangin chance a lo siam tawh - top flight league-ah open play aṭanga heti zat chance siam hi a la nei ngai lo.
• West Brom tana Hal Robson-Kanu-a goal kha November 2017-a Newcastle United laka a khung hnua Premier League-a goal-a khung leh hmasak ber a ni.

Ka Pa, i fapa hi min han en teh!
Alisson-a'n goal-a khung chiah khan Premier League-a goalkeeper, goal khung thei parukna a ni a, Liverpool keeper zinga competitive match-a khung hmasa ber a ni bawk. Brazilian keeper chuan, "Va tlan luh ve a, ka ṭhiante puih a, defender dang lo lak pen kha ka tum ber chu a ni a, mahse, tumahin min veng lo. Malsawm ka ni a, ka vannei takzet. A chang chuan thil thlengte hi sawia fiah kher thei a ni lo," tiin a goal khung dan chungchang a sawi.

Alisson chuan February thlaa tuikhuaha tla hlum a pa tan a goal khung chu a hlan thu a sawi a, kum 28 mi keeper hian a hmel lan dan aṭangin a pa a ngai takzet tih a lang. Khawvela keeper ṭha ber pawl chuan, "Pathianin ka lu chunga kut a nghah vang chauh a ni a, malsawm ka ni tih ka inhria a ni. Tun hnaia kei leh ka chhungte chunga thil thleng zawng zawng ka ngaihtuah a, ka lung a chhe em em a ni.

"Football hi ka tan chuan nunna a ni a, ni khua ka hriat tirh aṭangin ka pa nen kan khel dun ṭhin. Vawiinah hian ka goal khung lai kha hmu ve thei se ka ti takzet a, a kianga Pathian awm chungin min lo lawmpui ang tih ka ring a ni," a ti. Alisson hian a goal khung chu a goal khung zinga mawi ber pawl a nih thu a sawi zauh - mahse, Sky Sports journalist-in a goal khung la awmchhun a nih thu a hrilh! Brazilian keeper-in fiamthu a thawh zui a, "Chuti a nih chuan ka goal khung ṭha ber a nih chu," a ti a, "Goal khung tura ka tlanchhuah fo a ngaih loh ka beisei," a ti bawk.

"Alisson khan a tauh ṭha takzet a, a awihawm loh hial zawk a ni. Khatiang thil kha ka la hmu ngai lo a, ka awih phal lo hial zawk. Alisson tana kha goal hlutzia kha kan hria a, rilru a khawih takzet. Mi tam tak tan chuan football-a ni ve mai a, kan tan erawh kha kha khawvel chu a ni. Kan game kha kan season hrilhfiahna awlsam ber a ni. Ṭha takin kan khel a, kan tihsual awmchhunah hrem kan ni nghal a, theihtawp kan chhuah zui a ngaih phah. Baggies ang team tum hi chuan a harsa ṭhin a, player an rem dan leh tlarhnung lama an khelh dan thleng hian a harsa em em zel. A tawpah chuan a chingfel turin Alisson kan mamawh ta a nih kha".
- Jurgen Klopp, Liverpool manager

"A chang chuan theihtawp chhuah chung pawhin beisei anga thil a thlen theih loh chang a awm ṭhin. Huaisen takin kan bei ho a, ka ṭhiante ka pui thei kha ka lawm takzet a ni. Champions League khelh ngei kan duh - kan lo champion tawhna a ni a, chutiang ti leh tur chuan qualification aṭang hian bul a inṭan nghal tih kan hria. Hei vang hian tunah hian ka hlim em em a ni. - Alisson, Liverpool goalkeeperA chang chuan theihtawp chhuah chung pawhin beisei anga thil a thlen theih loh chang a awm ṭhin. Huaisen takin kan bei ho a, ka ṭhiante ka pui thei kha ka lawm takzet a ni. Champions League khelh ngei kan duh - kan lo champion tawhna a ni a, chutiang ti leh tur chuan qualification aṭang hian bul a inṭan nghal tih kan hria. Hei vang hian tunah hian ka hlim em em a ni". - Alisson, Liverpool goalkeeper