Stamford Bridge-ah Chelsea Vs Leicester City
Zanin dar 12:45-ah FA Cup final rematch hmuh tur a awm dawn. Stamford Bridge-ah Chelsea-in Wembley Stadium-a an hneh loh Leicester City an hmachhawn ang.
Blues leh Foxes inkhela chak lo zawk tan season thara Champions League khelh a harsa dawn a, chuvangin zanin hi UCL khel tur zawnna 'Playoff' ang hiala sawi theih a ni.
Thil awm dan
Leicester hian point 66 an hmu a, Chelsea-in point hnihin an pha lo. Team pahnih hi a sang pali zingah awm rih mah se panganaa awm Liverpool-in point 63 an hmu ve bawk.
Jurgen Klopp-a hote hi panganaa awm siin an kutah engkim a awm a, Foxes leh Blues tan hmunruak pakhat chauh a awm tihin a sawi theih. Hemi a nih avang hian zanin inkhel tur hi a pawimawh takzet.
Blues hmabak a thim?
Frank Lampard-a chhuahsan Chelsea chu Thomas Tuchel-a hnuah an par vul a, Champions League leh FA Cup nomawi chawi thei dinhmuna an din bakah season thara UCL khel pha ngei tura ngaih an ni bawk.
Amaherawhchu FA Cup final-ah Foxes an chak ta zawk a, Chelsea a mangang. UCL final-ah Manchester City an hmachhawn dawn avangin rinkai lo zawk an ni a, zanina Leicester an hneh loh nawn phei chuan nomawi chawi loh bakah season thara Europa League khelh chu an hmabak a ni thei ang.
A chunga tarlan ang hian Blues hian season khar ngat se, German manager Tuchel fak a harsa ṭalh tawh ang. Chutihrualin Chelsea hi phuba la turin an ṭha tawk a, Leicester defender Daniel Amartey chet dan vang ringawt pawhin chak châkna an neih belh ang.
Foxes defender Amartey hian inkhelh banah inkhelh hmaa captain-ten an inpek ṭhin Chelsea pennant chu lain chhuatah a paih a, FA Cup champion a lawm zui. Ghanaian defender chet dan hian Blues ṭantute a ti thinur hle.
Foxes tan a pawimawh
FA Cup champion Leciester City hian season liam ta khan hun rei zawk palina chinah awm mah se season tawp lama an chetsual avangin Europa League an khelh phah. Tun season-ah thawnthu ngai kan hmu nawn lo ang tih a sawi theih loh.
Foxes hian Chelsea zawhah Tottenham Hotspur an hmachhawn dawn a, Blues laka an chesual a nih chuan thawh chhuah a harsa dawn. Chutihrualin Rodgers-a hote hian zanina Chelsea hi an hneh a nih chuan season tharah Champions League an khel ang.
Leicester City hi Big Six an tih zingah tel lo mah se a sang paruk zingah erawh an tel ve zel. Brendan Rodgers vanga tun dinhmun thleng thei hi an ni tih a chiang a, an player-te pawh hi thlir ta ila. Goalkeeper Kasper Schmeichel, defender Caglar Soyuncu leh Wesley Fofana, midfielder Wilfred Ndidi, Youri Tielemans leh James Maddison bakah striker Jamie Vardy te an awm avangin team ṭha tak chu an ni hrim hrim.