Swiatek tan Italian Open nomawi

Iga Swiatek chuan world number 1 hlui Karolina Pliskova chu 6-0, 6-0 a sawpin Italian Open champion a ni a, hlawhtlinna a chan avang hian world ranking lamah pawh player paruk kal kanin pakuana dinhmun a luah.

Pathianni zan final inkhelah Swiatek hi kawng engkimah a chungnung. Nomawi chawi tur hian minute 46 chauh a hmang a ni satliah lo, game a hloh miah lo! Point hmuh theih 64 zinga 51 teh meuh huiin a chak chiang hle.

Poland nula hian season hmasa khan khawvel barakhaihin French Open title a la, a hnuah Adelaide Open la lehin tunah chuan Rome khawpuiah a chungnung ber - Roland Garros nomawi a chawi kha tihpalh thil tih a ni lo tih a fiah.

Kum 19 mi Swiatek chuan, "Tournament hi a tir aṭanga a tawp thlengin a hautak. Player ṭha tak tak an inlan a, chutiang kara a vannei nih chu thil nuam tak a ni. Rome khawpui hi ka ngaina a, naupan laia inkhelh ve ka chak em emna hmunah ka hlawhtling ve ta," a ti.

Chak lo Pliskova pawhin thawh chhuah nghal a tum thu sawiin, "Tun hma lamin match ṭha tak tak ka lo khel ve tawh ṭhin a ni mai thei, tuna mi erawh theihnghilh nghal daih tlak a ni," a ti.

Seeded pakuana Pliskova hian tun hmain Rome Open hi final vawi thum a khel tawh, tawnhriat a nei ṭha tawh hle. Tun ṭumah erawh a vawi khat nana final kheltu Swiatek a ngam lo hle a, insiamṭhat ran a mamawh.

Nimin khan hmeichhe tennis thuneitu sang Women's Tennis Association chuan world ranking a ti chhuak thar a, tleirawl duhawm Swiatek hi a sang zual 10 zingah in vawrh lutin pakuana dinhmun a luah.

Tun thla tawpa kum 20 tling ve tur Swiatek chuan, "Nikum French Open hnu khan rei tak chhung chu result ka nei ṭha lo, rilru a nuam lo hman duh hle. Tunah erawh kawng dik ka zawh thei leh ta hi ka lawm hle," tiin a sawi.