Rome roreltu chu Nadal bawk
Clay court chungah chuan Rafael Nadal aia tennis player lian an awm thei lo. Spanish tlangval hian Novak Djokovic lakah 7-5, 1-6, 6-3 a hnehna changin Italian Open nomawi a chawi - Rome khawpuia inelna lianah hian vawi 10 teh meuh a champion tling ta.
Nadal hian ATP Masters 1000 title hi 36 a la tling ta chiah. Grand Slam dawta an ngaihhlut tournament-ah hian champion hnem ber Djokovic a nihrual ta chiah a, player ropui pahnih hi an la in um chho zel ang.
Final hmuhnawm
Pathianni zan final khelh hma khan, player pahnihte an intawn tawhnaah Djokovic hian vawi 29 hnehna changin Nadal hi ṭum 27 a chak thung - an in tiattawk hle, tun ṭuma an inbei tawk pawh hi a mak hran lo.
Set hmasa tir lamah service an hloh ve ve a, 5-5 a nih hnuah Nadal-a'n backhand ropui hmangin Novak service a chhuhsak a, a dingchang hmasa zawkah a ṭang; set hnihnaah erawh Spanish star hian game khat chauh a la.
Chak zawk chiang turin set thumna an khel zui. Game hnih ve ve an la a, world number 1 zawk a service laiin 40-0 in a hnufual a, ama service a hloh chhunzawm - darkar hnih leh minute 49 zet an inkhelh hnuah Nadal a chak.
Nadal a lungawi
Hnehna a chan hnuah Nadal chuan, "Rome khawpuiah hian tun hmain ka tana nomawi pawimawh tak chu ka lo chawi tawh, tunah a vawi 10 nana hlawhtlinna ka chang leh hi thil lawmawm bik a ni a, ka chak dan hi a lungawi thlak hle.
"Roland Garros-ah vawi 10 chuang ka champion tawh a, chu mai a ni lo - Monte Carlo, Barcelona leh Rome khawpuia title vawi 10 ka la tling thei hi tun hma lama ka suangtuah phak ngai loh thil a ni," tiin a sawi.
Serbian tlangval lakah Nadal hian vawi 28 hnehna a chang tling ta chiah a, an pahnih intawnna bikah match khatin chak tlem mah se lehthal turin hun a la ngah tawk; nomawi chawi hnem leh mimal record inchuha a inel chho tur hi a hmuhnawm ang.
Hmabak French Open
Tun thla chawhnu lam aṭangin French Open an khelh dawn. Paris khawpuia inelna lianah hian nomawi kawl mektu chu Nadal bawk hi a ni a, season dang ang bawkin player dang zawng zawng chuan Nadal hmachhawn hi an chak lo ang.
Madrid Open-ah khan Nadal hian Alexander Zverev a ngam lo, tun ṭumah erawh German star hi quarterfinal-ah a hneh. Italian Open nomawi chawi tur hian set khat chauh a hloh a, chu pawh final-ah a ni. Clay court chungah chuan player dang chunga leng a la ni.
Player ṭha dang rawn chhuak ṭhin mah se Nadal el phak tur chuan Djokovic bawk a rintlak leh dawn niin a lang. World number 1 hian Greek tlangval huaisen Stefanos Tsitsipas leh tualchhung player ṭha Lorenzo Sonego te a hneh - French Open lamah pawh 'Nadal vs Djokovic' kan hmuh a rinawm.
