Mangṭha Barca: Atletico nge Real zawk?

Pathianni tlai thleng kha chuan La Liga-ah champion thei team pathum an awm a, Pathianni zan a ral meuh chuan champion thei team pahnih chiah an awm ta.

Barcelona-in an mikhual Celta Vigo chu 2-1 in an ngam lo a, an league match hnuhnung berah chak pawh ni se an champion thei tawh lo - Atletico Madrid leh Real Madrid an chak a, an umpha thei tawh lo.

Catalan club tan Lionel Messi chuan goal hmahruai khung mah se Celta Vigo-in Santi Mina goal hnih hmangin an chhanglet a, 2-1 in an chak daih.

Atletico Madrid-in 1-0 a an hnufual hnuin Osasuna chu Renan Lodi leh Luis Suarez goal hmangin an lehthal a, Real-in Nacho goal hmangin Athletic Bilbao chu 1-0 in an hneh ve bawk.

Sorry, Messi!
Barcelona-in chak mamawh chungin Celta Vigo an mikhual a, Messi-a'n minute 28-na lekah goal hmahruai a khung - tun season La Liga-a goal 30-a khungna chiah a ni.

Mahse, Messi-a'n thlawptu tur a nei lo. Mikhual team tan Santi Mina chuan minute 38-naah si phurh a sut a, Barca defender Clement Lenglet chu minute 83-naah a yellow card pahnihna avangin hnawhchhuah zui a ni.

Celta-in minute ruk hnuah a tam zawk an nih an chhawr nghal a, Mina chuan goal khat khung lehin a team a chakpui - Messi-a'n league-a goal 30-a khung bakah assist vawi 11 a nei a, a team tan a tih tur ti mah se a chhan zo lo a, La Liga nomawi an mangṭha.

Argentine forward hian inelna dang nen phei chuan tun season-ah goal 38 khungin assist 14-a nei a, season 13 chhung chu a zawnin goal 50 (goal & assist) ah a inrawlh ziah a, a aia sang beisei tur a awm chuang lo.

An duh loh kha...
Barcelona-in Suarez an duh tawh lo a, an duh loh striker hian league nomawi chawi turin match khat chak bak a mamawh ta lo - Ronald Koeman-a'n a lu thak lo pui a hiat a hiat ang.

Atletico mualah goal-a lut har a, Osasuna tan Ante Budimir chuan rin loh takin minute 75-naah a khung. Hetihlai hi Real-in 1-0 a hma an hruai lai a ni a, hetiang hian inkhel tawp ta se Real-in match khat khelh tur la awmah point khatin hma an hruai daih thei.

Mahse, Diego Simeone nauten an kuta nomawi awm tawh thlauh an duh lo - bench aṭanga luhtir Lodi chuan tawih zetin si phurh a rawn sut a, hun tawp nan minute hnih chiah a awm tawh tihin Suarez chuan chakna goal-a khung zui.

Atletico vanneih zan a ni lo zawk - Suarez-a'n post a tih per a, Stefan Savic goal chu VAR hmanga ennawn a nih hnuah offside vangin pawm a ni lo bawk. Kum 34 mi Suarez hian La Liga match 31 aṭangin goal 20-a khung a, assist vawi thum a nei.

Real an chak
Zinedine Zidane-a nauten champion loh an duh lo a, La Liga match tawp thlengin Atletico an um dawn - khualmualah Athletic Bilbao chu 1-0 in an hneh a, point hnihin Atletico an thlau chhunzawm zel.

Real tan Nacho chuan minute 68-naah inkhela goal awmchhun hi Casemiro siamsak aṭangin a khung a, he goal hi Karim Benzema offside vangin ennawn ni mah se referee-in VAR-a rawn hnuah a pawm.

Minute 89-naah Bilbao attacking midfielder Raul Garcia chu hnawhchhuah a ni a, Real tan goal khung belh turin hun erawh a tam tawk tawh lo. Real hian an league match tawp berah Villarreal chu May 22 zanah an mikhual dawn - champion tur erawh chuan an chak a, Real Valladolid (May 24) leh Atletico an inhnehtawk tal a ngai ang.

Real hi Atletico lakah an head-to-head result a ṭha zawk a, Atletico hi Valladolid nen inhnehtawk se, Real hi chak ta se, an point hmuh zat a inang ang a, head-to-head dinhmun ṭha zawk Real an champion daih thei. A tawi zawnga sawi chuan champion turin team pahnih tan chak ngei ngei chu tih tur hmasa a ni a, Real erawh Atletico kutah an innghat tel thung.