Zaninah Man City leh Man United an inlan dawn

Premier League-ah team tinin match hnih chauh khelh tur an nei tawh a, inelna hi May 23, Pathianni zanah khelh zawh a ni dawn. Zanin dar 11:30 hian champion thar Manchester City-in Amex Stadium-ah Brigthon & Hove Albion an hmachhawn dawn a, Europa League final khel tur Manchester United-in zanin dar 10:30-ah Fulham an hmachhawn ve bawk ang.

Pep Guardiola hote hi Premier League leh League Cup-ah an champion tawh a, Champions League final atan an inpuahchah chho mek. Tun hnaia Manchester khawpuia nomawi lut ho hi chu ṭhenawm bengchheng tiha Sir Alex Ferguson-a sawi ṭhin Citizen lak a ni deuh zel a, tun season-ah erawh Man United-in Europa League nomawi an chawi lut ve thei ang.

Pep-a leh sum
Man City manager Pep Guardiola-a'n hi football manager zinga thluak nei ṭha ber zing mi a ni a, team ṭha a enkawl bakah sum hman tam vangin a champion ṭhin ti bawk mah se a hlawhtlinna hi sawi nep chi a ni lo.

Barcelona a chhuahsan hnu khan Pep hian player lakluh nan dollar tluklehdingawn 1.37 a hmang tawh a, nomawi 17 a chawi. Nomawi pakhat chawi tur hian dollar maktaduai 80 ang vel zel seng ang a ni.

Hemi chhung vek hian Pep-a elpui ber ṭhin Jose Mourinho khan euro tluklehdingawn 1.1 sengin player a lalut tawh a, nomawi panga a chawi. Nomawi pakhat chawi nan dollar maktaduai 220 a seng thung.

Manager dang chet dawn pawh thlir ta ila, Frank Lampard-a'n nomawi a la chawi lo. Ole Gunnar Solskjaer pawhin Manchester United a zawm hnuah nomawi a la chawi lo a, manager pahnih hi dollar maktaduai 100 chuang ve ve player lakluh nan ang.

Pep erawh a mah ruaituten chelh dan kawng an dap zel a, Man City pawhin an chelh theih avangin an lawm hle. Football manager ṭha dang erawhin ban an tawk chho zel a, Mourinho pawh a khat mawi tawkin an ban chho a, Lampard pawhin hun rei tak team a la enkawl lo chungin ban a tawk ve tawh bawk.

Pep-a game plan
Pep Guardiola hian khelh dun dan a nei a, a khingpuite milin siam rem ve hret hret ṭhin mah se a khingpuite erawhin Guardiola dan dan tur tawpin game plan an siam ṭhin. Hei tak hi Man City manager Guardiola ropuina a ni.

Man City-in Champions League final atan inpuahchahna an nei chho zel a, Spanish manager hian league-ah player a thlak kual nasa hle. Match hnuhnung bera Newcastle United an hneh ṭumah phei chuan third keeper Scott Carson a inlan.

Kum 35 mi Carson hian kum 2019 khan loan hmangin Derby County aṭangin Man City hi a zawm a, Newcastle hi a vawi khat inlanna a ni. English keeper hi Premier League champion tana khel a nih miau avangin a vawi khat inlannaah 'guard of honour' a dawng.

Inkhelh banah erawh Ferran Torres-a hattrick siam an sawi zui nasa a, Chelsea nena penalty hlahtu Sergio Aguero erawh squad-ah a awm lo. Zanina Man City-in Brighton an hmachhawn hunah pawh hian Pep-a'n starting eleven a siksawi leh nual a rinawm hle.

Chak harsat United
Manchester United-in season ṭha tak an hmang a, Champions League khel tura an tlin tawh bakah Europa League final an khel dawn. Amaherawhchu ni riat chhunga match li kheltu Ole Gunnar Solskjaer-a hote hi tun hnaiah an chak thei meuh lo.

Man United hian match hnuhnung paliah AS Roma, Leicester City leh Liverpool te an hneh lo a, Foxes an hmachhawn ṭum hian team ṭha tir lo mah se Reds an hneh loh danah erawh insiamṭhat an mamawh zia a lang.

Solskjaer-a hote tan Europa League final khelh hmaa inrintawkna neihna turin chak a ngai a, zanina Fulham an hneh ngei hi a pawimawh hle. Norwegian manager Ole chuan, "Dan James leh Anthony Martial te an dam leh tawh a, chanchin lawmawm a ni," tiin a sawi a, bul an ṭan erawh a la rinawm loh.

Man United buaina ber erawh tlarhnung a ni a, Harry Maguire a tel loin tlarhnung a phui tawk lo. Chutihrualin tun ṭumah erawh Maguire tel loa khelh dan an zir a ṭul a, English defender hi inhliam vangin a la inlan thei dawn lo.