AC Milan an chelh rih
Chak se la chuan AC Milan khan season thara Champions League khel turin an tling chiang ang. Mahse, Stefano Pioli enkawl team hi an mikhual Cagliari nen goal awm loin an inhnehtawk a, an dinhmun ti chiang turin match hnuhnung ber an nghah a ngai.
Serie A aṭangin champion Inter Milan bakah Atalanta te chu UCL khel turin an tling chiang tawh. Napoli, Milan leh Juventus ten hmunruak pahnih la awm an inchuh dawn a, Italian football season kharna inkhel boruak a 'hot' dawn.
An chelh
Milan hian chak a pawimawhzia hre chungin mikhual an thleng a, mahse an striker pawimawh Zlatan Ibrahimovic chu khup hliam vangin an chhawr thei lo a, Swede striker awm loh zanah goal hmaah an hriam tawk lo.
Table mawng lama awm Cagliari hian kum 1999 hnu lamah San Siro-a Milan an hmachhawn ṭumin point an la hmu ngai lo a, team pahnih dinhmun leh an sulhnu chhut chuan mualneitu hi nuamsa taka chak tura ngaih an ni.
Mahse, Theo Hernandez, Alexis Saelemaekers leh Hakan Calhanoglu ten an hun ṭha bik hmuh an hlah vek a, ball chang tamin inkhel thunun mah se an mamawh ber an hlawh chhuak thei lo. Mikhual defender Diego Godin khung tur chu Gianluigi Donnarumma-a'n a lo dang hram.
Pioli a lawm lo
Milan manager Pioli chuan, "Tun hnaia kan match khelh hoah chuan a ṭha lo ber a ni hial ang. Engkim mai kha a kal fuh lo zawk a ni ber maiin ka hria, khatiang aia rang khan ball inpe kual tur kan ni a, mahse kan thei si lo.
"Hnehna chang ila chuan UCL kan khel chiang dawn tih kan hria, khami boruak kha kan zo lo emaw ni chu aw tih theih a ni. Tunah chuan hun kal tawh ngaihtuah a hun lo, khelh hmabak atan rilru zawng zawng kan pe ang," a ti.
Milan hian an match hnuhnung berah team ṭha Atalanta an hmachhawn dawn. Atalanta hi UCL atan tling chiang tawh an ni a, league match karlakah Coppa Italia final khelh tur an neih bawk avangin an hah dawn - mahse team ṭha an nih avangin a harsa dawn.
Thil awmzia
• Match hnuhnung berah Milan leh Atalanta an inkhel dawn. Napoli vs Hellas Verona leh Bologna vs Juventus kan hmu bawk ang.
• Milan leh Napoli hi a chak a nih chuan UCL khel turin an tling ang, team pahnih an chak chuan 2011-12 hnua a vawi khat nan Juve chuan UCL an khel phak dawn lo.
• Milan emaw Napoli emaw chak lo an awm a, inkhel dangah Juve an chak ve thung a nih chuan Andrea Pirlo naute an tling ve thung ang.
• UCL khel turin Juventus tan Bologna hneh ringawt a tawk dawn lo, an chunga mite chetsual an ngaihchan tel a ngai tihna a ni.
