Ligue 1 nomawi chawi tur la chiang lo

France rama football inelna sang ber Ligue 1 nomawi chawi tur a la chiang thei lo. May 23, Pathianni zanlaiah league match hnuhnung ber chu a ruala khelh zawh a ni dawn a, a chungnung ber a hriat chauh ang.

Pathiann zan khan Ligue 1 club-te hi a rualin an inlan vek tawh. Hmahruaitu Lille chu an mikhual Saint-Etienne nen goal awm loin an inhnehtawk a, champion lai Paris St-Germain erawhin Reims lakah 4-0 in hnehna an chang thung.

Lille hian point 80 nei tawhin hma an hruai zel a, an hmabakah Angers an la awm; an chak a nih chuan midang result ngaihchan tel ngai loin league nomawi an chawi nghal thei dawn, engkim an kutah a innghat tihna a ni.

PSG erawhin Lille hi point khatin an phak lo, an match hnuhnung berah Brest an hneh chun nomawi humhim an la beisei thei, amaherawhchu anmahni chak ringawt a tawk dawn lo, an chunga awm Lille-in point an hloh a ngai tel dawn.

Mauricio Pochettino naute hian tha thlah a thiang lo tih hre chungin Reims an mikhual a, minute 10-na lekah mikhual defender Yunis Abdelhamid hnawhchhuah a nih avangin PSG tan kawng a awlsam phah hle.

Neymar-a'n penalty aṭangin goal hmahruai a khung a, chawlhlawk hmain forward ṭha mi Kylian Mbappe-a'n a belh bawk. Inkhel chawhnu lamah PSG hian an la duhtawk mai lo, defender Marquinhos leh Moise Kean te hmanga khung belhin an chak chiang viau.

PSG manager Poch chuan, "A pawimawh ber chu beisei kan la nei thei tih hi a ni. Chutihrualin Ligue 1 chauh kan ngaihtuah thei lo, tunah chuan Nilai zana AS Monaco nen French Cup final kan khelh tur kan ngaihtuah hmasak a ngai dawn.

"Final atan rilru zawng zawng kan pe ang a, kan theihna sang ber kan hlan ang. Chumi hnuah kar tawpa league match khelh tur kan ngaihtuah chhunzawm ang, tunkar hi kan tan chuan hun pawimawh bik a ni ang," a ti.

Thomas Tuchel thlaktu Poch tan French Cup chawi hi a pawimawh dawn. Champions League-ah beisei an phak lo a, league title pawh hloh mai thei dinhmunah an ding. Chuvangin Monaco hneh chunga cup lak ngei a tum ruh khawp ang.