Curry hoin Warriors an tlang

Nimin zing khan NBA regular season bik chu khelh zawh a ni a, player ṭha bik Stephen Curry hoa khel Golden State Warriors chuan Memphis Grizzlies lakah 113-101 a hnehna changin 'Play-In' an khel dawn.

American guard Curry-a'n point 46 a nei a, regular season hman zawh takah khan chawlh rualin match tinah point 32.0 nei zel ang a ni a, a chungnung ber - a hnuaiah hian Washington Wizards player ṭha Bradley Beal (31.3 points per game) a awm.

Kum 2016 khan Curry hian hetiang dinhmun hi a lo luah tawh, tunah chuan kum 33 mi a ni tawh a, legend Michael Jordan hnung zuiin kum 33 tlin hnua regular season point bik chawhruala sang ber ni thei a ni.

Season hmasa khan GSW hian hliam vangin Curry hi an chhawr thei lo, table hnuai lama awm chungin hun an hmang. Kuminah erawh an thiampuipa hoin an rawn tho chhuak leh a, tun hnaiah a zawna match ruk chakin Western Conference-ah pariatna dinhmun an luah.

Kuminah hian season danga an tih ngai loh 'Play-In' khelh a ni dawn. Conference pahnih aṭangin playoff khel tur - seeded pasarihna leh pariatna zawnna a ni dawn a, Nilaini zing aṭangin an khel ṭan ang.

Western Conference lamah Warriors hian NBA champion lai Los Angeles Lakers an hmachhawn ang a, inkhel dangah San Antonio Spurs leh Memphis Grizzlies an inkhel dawn.

Eastern Conference lamah chuan Washington Wizards leh Boston Celtics an in bitum ang a, Charlotte Hornets hmaah Indiana Pacers an ding ve thung dawn a ni.