Zanin dar 12:30-ah Coppa Italia final Juventus hmaah Atalanta ding dawn

Nomawi chawi theihna kawng dang a awm tawh lo, zanin chauh hi Juventus mualpho lutuk tur hliah khuh theihna remchang chu a ni ta. Dar 12:30 hian Italy rama khelmual pakhat Mapei Stadium-ah Old Lady leh Atalanta ten Coppa Italia final an khel ang.

Season hmasa khan Juve hian final-ah Napoli an ngam lo, mahse Serie A title an lak tho avangin a tawrh dan a ziaawm deuh mai thei. Tun season-ah erawh Andrea Pirlo naute hian nomawi dang zawng zawng an banphak tawh lo, cup inelna chauh hi an beisei awmchhun a ni.

Team pahnih sulhnu leh player neih dan a inthlau hle. Juventus forward Cristiano Ronaldo hlawh hi Atalanta player zawng zawng hlawh belhkhawm ai pawhin a tam zawk nia sawi a ni! Tun ṭumah erawh chak tura rinkai zawk an awm bik lo.

An dinhmun
Ronaldo awmna Juventus hi an player neih dan thlir chuan Italian club zingah an sang filawr. Mahse, season an hman ṭhat loh avangin a sang pali zinga tel lo thei dinhmunah an ding mek, match hnuhnunga midang result an ngaichang mek.

Juve ṭhatzia inhrilh nawn a ngai lo, chutih rualin zania an khingpui tur Atalanta hi sawi nep theih an ni bik lo. Season hmasa khan Serie A team zinga goal khung hnem ber an ni a, kuminah pawh (90 goals) anni aia khung hnem an awm chuang lo.

Gian Piero Gasperini enkawl Atalanta hi season thara Champions League khel turin an tling chiang tawh a, a sang pali zinga tel ringawt hi an duhtawk lo ang. Team ṭha tak tak an ni tih fiah nan nomawi chawi ngei an tum dawn, attacking game hmuhnawm beisei rawh.

Team pahnih an intawn hnuhnung chu kumin kumtir lam kha niin, inkhel thununtu Atalanta hian 1-0 in hnehna an chang a, goal khung theihna remchang an insiam hnem hle - Pirlo tan tlarhnung rem phui a pawimawh ang.

Pakhat tal...
A zawna season kua ngawt an chawi tawh Serie A nomawi chu Inter Milan lakah an chan a, na tak a ni ang. Tawnhriat nei lo Pirlo an rin avangin club thuneitu lam erawh dem ngawt theih an ni bik lo, chutih rualin nomawi pakhat tal chawi loa an tluan a nih chuan nghawng a nei dawn.

Pirlo-a'n hrem vangin midfielder Rodrigo Bentancur a chhawr thei dawn lo, defender Merih Demiral chu a dinhmun a chiang lo bawk - player langsar dang erawh buaina leh harsatna nei an awm hran lo.

Season tawp rualin Gianluigi Buffon a chhuak dawn, kum 43 mi keeper tan a hun hnuhnung ni tawh mah se inkhel pawimawh bik a nih avangin Pirlo-a'n a ṭhianpa hi a luhtir ngawt ngam kher lo mai thei; Wojciech Szczesny a inlan a rinawm zawk.

Tlarhma lamah chuan Ronaldo a awm dawn, ani kawppui tur hi chinfel ngai chu a ni. Portuguese forward hi Paulo Dybala nen an khel dun thei a, mahse Argentina international hian indip chang an nei bawk - Dybala a lut lo a nih chuan tlarhma laiah Ronaldo a awm a rinawm.

Nomawi kan duh
Atalanta manager Gian Piero Gasperini chuan league lamah an dinhmun a ṭha tawk tawh a, tuna an duh ber chu Juventus hneh chunga Coppa Italia nomawi chawi a nih thu a sawi a, zaninah hlawhtlin ngei tumin thapui an thawh leh ngei ang.

Gasperini chuan, "Mite chuan a zawna season thum UCL kan khelh phak hi an sawi reng lo mai thei, nomawi kan chawi a nih erawh chuan an sawi rei tawh khawp ang. Ṭha taka khelh ringawt a tawk lo a, eng ang tak nge kan ni tih fiah nan nomawi a ngai.

"Kan match khelh hnuhnung 14 aṭangin vawi khat chauh chak loh kan nei, heng zinga 12 zetah hnehna kan chang. Player leh manager ropui tak kan ni lo a nih pawhin football team ṭha tawk tak chu kan ni ve chiang," tiin an inrintawk thu a sawi.

Atalanta hian dendenfer Rafael Toloi chu hliam vangin an chhawr thei dawn lo a, player dang erawh an dam. Team angin goal khung hnem mah se mimal goal khung tam an nei hran lo - Duvan Zapata, Ruslan Malinovskiy leh Luis Muriel te hi ven ngun ngai bik an ni ang.

Ronaldo a chhuak dawn?
Coppa Italia final leh Serie A match khat khelh hmabak an la nei a, season an hman zawh hmain Cristiano Ronaldo chanchin chu titi tui ber a ni chho leh mek - Real Madrid forward hlui hian Turin khawpui aṭangin a car manto neih ṭhenkhat chu a thiar chhuak.

Ronaldo-a car hi khawi lamah nge an phurh chhuah dawn tih erawh hriat a ni lo. Mahse, Juve hian nomawi an chawi lo emaw, season tharah Champions League an khel phak lo emaw a nih chuan an forward hi an chan mai a rinawm viau.

Kum 36 mi ni tawh mah se Ronaldo hi player dangte chunga leng a la ni reng. Tun season league match 33 a khelh aṭangin goal 29 a khung a, Italian football inelna sang berah ani aia khung hnem an awm lo. Tun hnai khan Ronaldo hi a nu Maria Dolores dos Santos Aveiro chuan a fapa hi Sporting tana khel tura a duh thu a lo sawi ri tawh a, engtik niah emaw chuan an ram lamah hian a kir a la rinawm.

Amaerawhchu, tun dinhmunah Ronaldo hian inelna sang ber hmachhawn a la duh tih a chiang. Old Lady a chhuahsan a nih pawhin Champions League title beisei phak team zawm a duh ang - nipui bazar ti ngaihnawmtu chu a ni ngei dawn.