Pathian ka thunun thei lo - Venus Williams

Emilia-Romagna Open khelh laiah Venus Williams chu a match hmasa berah a chak lo. American star hi hun khawhral tuma puh a ni a, mahse ani chuan Pathian chu a thunun phak a nih loh thu a sawi ve thung.

Thawhṭan zan khan Parma khawpuiah thli a thaw nasa, Grand Slam vawi sarih champion tawh Venus hian a duh hunah a service thei mai lo a, tennis dan tharah hun khawhral rei phal a nih loh avangin chair umpire-in a zilh.

Venus chuan, "Thli a thaw nasa em em a, ka tan tih theih dang a awm tawh lo. Khatiang vanga dan bawhchhia min ti a nih chuan ka sawi phak a ni lo. Pathian thurel hi chu ka thunun phak a ni lo, amah zawt mai rawh," tiin umpire lakah a lungawi lo hle.

Kum 40 mi Venus hi a vanglai a pel tawh a, beisei ang result a nei thei ta meuh lo. Thawhṭan zan inkhelah pawh hian Venus hi Anna Karolina Schmiedlova lakah 5-7, 6-2, 6-2 in a chak lo - darkar hnih leh minute 39 chhung an inkhel a ni.

French Open inbuat-saihna tournament-ah hian Venus-i nau Serena Williams pawh a inlan. Serena hian tualchhung tleirawl Lisa Pigato chu 6-3, 6-2 in a hneh a, thla thum chuang hnuah hnehna a chang ve leh ta.

Seeded pakhatna Serena chuan, "Lisa khan a khel ṭha hle, tawnhriat la ngah lo mah se hmachhawn a awlsam lo. Kei pawh hun rei tak hnua ka khelh ṭhat ber ṭum ka tawng ve leh ta hi ka lawm," a ti. Serena hian last 16-ah Katerina Siniakova a hmachhawn leh ang.

Tun thla chawhnu lam aṭangin French Open khelh a ni dawn a, major title 23 la tawh Serena hian Grand Slam champion hnem ber Margaret Court (24 titles) record nih rual tumin Paris khawpui a pan leh dawn a ni.