Zanin dar 12:45-ah French Cup final : Monaco Vs Paris Saint-Germain

Coupe de France final chu zanin dar 12:45 hian AS Monaco leh Paris Saint-Germain ten Stade de France-ah an khel dawn. PSG hi champion lai an ni a, nomawi chawi tura rinkai ni bawk mah se Neymar an chawr theih hmel loh avangin Mauricio Pochettino hote hi chak chianga dah a rem lo.

PSG pual
Tun hnai bika France rama football inelna hrim hrim hi chu Paris Saint-Germain chanpual tiha sawi theih vek mai a ni a, French Cup-ah pawh hian PSG hian sulhnu an nei ṭha hle.

Kum 2015 aṭang khan kum tinin final an lut a, amaherawhchu kum 2019 khan penalty shootout-ah Rennes hneh loin an vanduai. Hei tak hi knockout danglamna a ni a, PSG hian record nei ṭha viau mah se champion chiang tiha sawi theih an ni lo.

Neymar a thinur
PSG-in French Cup final lut turin semifinal-ah Montpellier chu hun pangngaia 2-2 a an inhnehtawk hnuin penalty shootout hmangin 6-5 in an hneh. Hemi ṭum hian Neymar hi minute 86-naah a lut a, minute 90-naah yellow card a hmu a, hrem vangin final khel thei lo dinhmunah a ding.

Neymar chuan, "France rama football dan lekkawhna kawnga thuneitute hi yellow card dan a siam chungchangah fak an phu, hretthiam a harsa takzet," tiin ngeiawm takin thuneitute a kap.

Brazilian forward Neymar an hremna hi khinlet theih a ni a, thuneitu lamin thutlukna an sut a nih chuan final-ah a inlan thei tho ang. Chutihrualin PSG hian hliam vangin Marco Verratti leh hrem vangin Presnel Kimpembe te an chhawr thei dawn lo a, hmabak a harsat phah sawt dawn.

Innghahna Mbappe
PSG innghahna tur chu semifinal-a goal hnih khungtu Kylian Mbappe a ni leh dawn. French forward hian tun season-ah match 44 khel tawhin PSG tan a inlan tam ber a, goal 40 khung tawh bawkin amah hnaihtu pahnih Moise Kean (17) leh Neymar (17) te goal khung belhkhawm aiin a khung tam zawk.

Kum 22 mi Mbappe hian final-ah amah chher liantu Monaco a hmachhawn dawn avangin final danglam tak a ni thei ang. Mbappe hian Monaco a chhuahsan khan kum 19 mi chauh la ni mah se a hming chher ṭanna club Monegasques hi Ligue 1-ah a champion pui hman.

Monaco hi...
Monaco hi French club lar ber zinga mi an ni a, tun hnaiah PSG-in hliah mah se tun season bikah erawh an inthlau lo. League-ah ni se Monaco hian point 77 an hmu a, PSG hi point hnih chiahin a pha lo.

Mauricio Pochettino hote hi Ligue 1-ah an la chmapion theih avangin league match hnuhnung ber atan ngaihtuahna an sen tel ṭul a, Monaco erawh an ṭhat theih dan berin an khel thei thung.

Monaco tlarhmaah Wissam Ben Yedder (22 goals) leh Kevin Volland (18) te an kawl a, inelna hrang hranga striker pahnih goal khung belhkhawm chu goal 40 a ni. Monegasques-ah hian Cesc Fabregas-a'n hmun pawimawh a la chang pha a, Spanish midfielder hian semifinal-a Rumilly Vallieres 5-1 a an sawp ṭumin pawhin goal a khung a ni.