Clay-ah Federer a lo kir leh ta

Hun rei tak a inkhelh mumal loh hnuah Roger Federer chu clay court-ah a inlan leh ta a, world number 1 hlui hian Thawhṭan zan khan Geneva Open-ah Jordan Thompson chu 6-0, 6-4 in a hneh.

Grand Slam vawi 20 champion tawh Federer-a'n a match lehpekah chuan Andujar a hmachhawn leh dawn, a chesual viau a nih ngawt loh chuan harsa lutuk loin quarterfinal a lut thei tura ngaih a ni.

Kum 2019 French Open semifinal-ah khan Federer hian Rafael Nadal a hneh lo a, a hnu lamah tun ṭum hi clay court inelna a hmachhawn leh hmasak ber a ni a, tun ṭuma a inkhelh chhan pawh Roland-Garros leh Wimbledon inbuatsaih nan a ni.

World number 8 Federer chuan, "Hliam dam hlim nih chuan nidang anga khelh ṭhat nghal a harsa. Hnehna ka chan avang hian ka lawm a, chutih rualin player ṭha dangte nena khaikhin chi erawh ka la ni lo," tiin Nadal leh Novak Djokovic te nen huang khatah a indah duh rih lo.

French Open zawh rualin grass court season an hmang chhunzawm dawn a, inelna lian Wimbledon an khelh hma ngeiin Federer hian harsatna leh buaina nei loa tennis ṭha taka khelh theih a tum ruh hle.