Joshua vs Fury A thleng lo mai thei!

British boxer rothap Tyson Fury leh Anthony Joshua inhnek hun tur khawvel mipuiin thlir ṭhup mah se rin loh lam aṭangin chanchinthar duhawm lo a thleng a, Fury hi Deontay Wilder nena inhnek turin US lama dan kengkawhtu chuan a relsak.

Wilder leh Fury hi an inhnek hmasaa inhnehtawka puan an nih hnuin February 2020 khan an intawng leh a, kum 32 mi Fury hian hnehna changin Wilder-a kawl lai WBC world heavyweight title chu a chhuhsak.

Boxer pahnih hi a vawi thum nana inhnek leh tura tih an ni a, mahse, Covid-19 hri leng avangin July 2020-a an inhnek tur chu sawn a ngai. Wilder-a team lamin 2021 an rawt a, mahse, Fury hian a duh lo.

Fury-a'n hmachhawn tur dang a dap zui a, amah ang thoa British boxer Joshua nen an inbe fel ta maw tihah thuthar a awm a, Wilder nena inhnek tura tih a ni leh ta zawk.

Thawhṭanni zan khan US lama team pahnih buaina chingfel tura ruat chuan Wilder hian a vawi thum nana Fury hmachhawn tura zalenna a neih thu a sawi a, mahse, September 15 hma ngeia an intawn a ngaih tur thu a tarlang tel thung.

Fury promoter Frank Warren chuan, "Wilder-a team-te nen inremna kan neih theih hma chuan Fury vs Joshua hi a thleng ngei ang tiin ka sawi thei lo. Mahse, theihtawp kan chhuah mek e.

"Wilder-a team nen kan inbia a, kan inrem thei ta lo a nih chuan Tyson hian pawi a ti lo a nih chuan Wilder hi a hmachhawn leh phawt mai a ni ang chu. Chumi pahnih chu duhthlan tur kan neih chu a ni mai," a ti.

Fury hian Wilder hmachhawn tura tih a nih hma lawk hian Joshua nena an inhnek tur thu a sawi chiang hman a, Joshua hian hian IBF, WBA leh WBO belt a kawl mek avangin boxer pahnih hi an intawng a nih chuan heavyweight boxing-a title lian pali an inchuh hmasak ber tur a ni ang.

Joshua promoter Eddie Hearn chuan Joshua vs Fury hi a thlen ngei tur thu a lo sawi fo tawh a, Saudi Arabia chuan August 14-ah he inhnek hi thlen an tum.

Saudi Arabia-a he fight thlen tumte hian pay-per-view aṭanga sum lut tur chhiar tel lohin pound maktaduai 106 pek an inhuam a, an inhnek a nih chuan boxer pahnih hian a tlem berah pound maktaduai 100 ve ve chu an hum haw dawn tihna a ni.

Hetihrual hian Wilder ngaihthah a thiang lo a, team pahnih hian sum tam tham tak bakah Joshua vs Fury-a chak zawk tum tura an tiam chuan a inhnuhdawh theih mai rin a ni.