Jesse Lingard hma hun a chiang lo

West Ham-a season duhawm tak hmangtu Jesse Lingard hma hun a chiang thei lo a, kum 28 mi midfielder hi season tharah Hammers tan a khelh chhunzawm ang em, tih chu zawhna awm mek a ni.

January khan Lingard hian season tawp thleng loan-a khel turin Hammers hi a pan a, a tifuh hle - league match 14-a khelhah goal kua a khung a, assist vawi li a nei bawk.

Hei vang hian Lingard hi Manchester United-ah kir leh mai tura ngaihna a awm a, mahse, khawthlang media-te chuan United boss Ole Gunnar Solskjaer chuan Lingard hi chelh a tum lo niin an sawi.

April-a Premier League Player of the Month leh Goal of the Month award dawngtu Lingard hian kum 2022 nipui thleng Old Trafford-a cham turin contract-a nei a, United tan koh kir a, season tawpa a thlawna chhuahtir ai chuan a theih laia hralh hi a fuh zawk mai thei.

Hetihlai hian Lingard hian Hammers-ah a cham dawn a nih chuan kar khata £100,000 hlawh a phut nia sawi a ni a, kum li tal contract ziah a duh bawk - West Ham ang club tan sum a beisei zat hi a tam hret.

Lingard hi Tottenham Hotspur nen pawh sawizawm a ni a, transfer bazar tingaihnawm pawl a ni dawnin a lang - Hammers hian zanin dar 12:45-ah West Brom an lenchilh dawn.

David Moyes-a enkawl team hian Champions League thlengin beisei ve hman mah se European football-a club inelna sang bera tel tur chuan an tan thilmak a thlen tel a ngai tawh.