Kane-a'n Spurs chhuahsan a dil?

Tottenham Hotspur striker chhuanvawr Harry Kane chuan club hnenah chhuah dilna a thehlut nia sawi a ni a, hei hian Spurs-ah nghawng thui tak a nei nghala ngaih a ni.

Spurs thupuangtu chuan nimin khan thuchhuah siam nghalin, "A sang thei ang bera season khar tumin kan rilru kan seng a, hei hi mi zawng zawngin an rilru an pekna tur pawh a ni," a ti a, chhuah sawi hun a ni lo tih a tarlang.

Premier League match hnih chiah khelh tur awm tawhah Tottenham hian zanin dar 10:30-ah Aston Villa an mikhual dawn a, May 23 zanah Leicester City an lenchilh bawk ang.

London club hian chhiarkawp danah Champions League khelh theihna dan la nei mah se an chunga awm Leicester City, Chelsea leh Liverpool an chetsual ve vek a ngai dawn a, Europa League chu an beisei theih san ber a ni.

Tun season inelna hrang hranga goal 32 khung tawh Kane hian mimal angin chawimawina dawng hnem viau tawh mah se club tan nomawi chawi a la nei lo a, Spurs chhuahsan a duh hi a awm lo hran lo.

BBC Sport chuan Kane hian official taka chhuah dilna a thehluh loh thu an tarlang a, mahse, English striker hian Jose Mourinho ban a nih hnua League Cup final-a an tlawm khan chhuah a duh tih hriat takin ṭawngkam a lo nei tawh.

Kane hi tun hnaiah a club nen hian an inbe ngei erawh niin a lang a, Spurs hian sawmna tam tak hnara AS Roma-a a career hmang zotu 'Francesco Totti ang' ni turin an lo thlem nia sawi a ni!

Mahse, hei hi Kane-a team lamin an dawng fuh lo - Manchester City, Manchester United leh Chelsea-ten an striker hi an duh tih an hria a, Spurs ai chuan heng club pathumah hian nomawi chawina chance pawh a nei sang zawk vekin a lang.

Hriat tel tur erawh Kane hian kum 2018 khan London club-ah kum ruk chhung atan contract thar a ziak a, kum thum a la bak a, a contract-ah hian a chhuah theih dan tur ziah tel a ni lo bawk.

Chutihrual chuan player hlim lo kawl reng hi London club tan a fuh lo thei a, transfer-a thawhpui harsa tia an sawi ṭhin club chairman Daniel Levy tan ngaihtuahna sen ṭhat a finthlak ang.

Kum 27 mi Kane hi a chhuak dawn a nih chuan a man a tlawm lo ang tih a chiang a, Spurs tan English striker an hralhna aṭangin team thar a din daih theih dawn.

Covid-19 vangin Spurs hi club dang ang thoin sumah an talbuai a, coach Mauricio Pochettino leh Mourinho an bante khan an sum buaina a pui lo hle.

European Super League-a tel tum zinga an lo tel ve avanga sawisel hlawh tak Tottenham hi nimin khan Tottenham Hotspur Supporters Trust nen an inhmu a, an club ṭantu intelkhawm hian club thuneitute chu an hna chelh aṭanga bang vek turin an lo nawr tawh - he thu buatsaih a nih lai hian an thutlukna a la hriat loh.