Mancini-a'n contract pawt sei

Italy coach Roberto Mancini chuan an ram football team enkawl chhunzawm zel turin contract a pawtsei. Italy Football Federation (FIGC) president Gabriele Gravina chuan inremna hi an ziah fel tawh thu a sawi.

Mancini-a contract neih lai hi 2022 World Cup zawh ruala zo tur a ni. Tuna inremna thar an ziah hi kum 2026 thleng daih a ni a, Qatar bakah World Cup dang pakhatah an ram hi a kaihhruai thei dawn tihna a ni ang.

Gravina chuan, "Nomawi chu kan ngai pawimawh, chumi piah lamah chuan hmachhawp hlenchhuah tur tam tak kan nei. Mancini hian kum hnih chhungin hna a thawk ṭha hle, team a din kawngah keini pawhin theih tawpin kan thlawp," a ti.

Kum 56 mi Mancini hian 2018 May thla aṭang khan Italy hi a enkawl, match 28 kaihhruai tawhin vawi 19 an chak a, ṭum hnih chauh tlawm an nei. Match khelh hmabak pathum nei chungin Euro 2020 atan an tling a, UEFA Nations League-ah semifinal an lut tawh bawk.

June 11 aṭang hian European Championship an khel ṭan dawn. Italy hi Group A-ah Turkey Wales leh Switzerland te nen an awm khawm a, an match hmasa ber atan Rome khawpuiah Turkey an hmachhawn ang.