Hodgson a chawl dawn

Roy Hodgson chuan season tawpa a contract tawp rualin Crystal Palace a chhuahsan dawn. England manager hlui Hodgson hi kum 73 mi a ni tawh a, a thlakna tur manager zingah Frank Lampard pawh sawi tel a ni.

Crystal Palace hian zanin dar 11:30 hian Arsenal an mikhual dawn a, Selhurst Park-ah hian entu 6,500 an awm thei dawn a, Hodgson-a thlahna thu an pholan tam a rinawm.

Hodgson chuan, "Kum 45 chhung coaching ka luhchilh hnuah thutlukna siam a hun tain ka hria, Premier League ka kalsan a hun ta. Match hnuhnung pahnih hi Palace ka enkawl hnuhnun ber tur a ni ang," tiin a sawi.

Kum 1976 khan Hodgson hian Sweden club Halmstad a enkawl a, coach leh manager hna a ṭan hmasak ber niin ram pariatah club 16 a enkawl a, England national team hian kaihruai thei a ni.