Hall of Fame-ah Man United captain hlui pahnih Eric Cantona leh Roy Keane

Premier League Hall of Fame a dah luh tur pathumna leh palina an puang a, Alan Shearer leh Thiery Henry hnung zuitu chu Manchester United captain hlui pahnih Eric Cantona leh Roy Keane te an ni.

Manchester United ṭantuten 'King Eric' tia hminglem an pek Cantona chuan, "Mak ka ti lo. Min telh lo se mak ka ti zawk ang. Pakhat chauh thlan tur ni se, keimah hi ka ni ang," tiin a sawi. French pa chanchin ngah tak Cantona-a'n phu a intih viau lai hian Roy Keane chuan, "Vannei ka inti hle, tun dinhmun ka thlen theih chhan hi ka khelhpuite vang a ni," tiin inngaitlawm takin a sawi thung.

Kumin hian Hall of Fame-ah player pariat dah luh an ni dawn a, tunah hian pali an puang tawh a, May 21-ah an puang kim ang.

Cantona leh Keane
Premier League ṭan hma season-ah Eric Cantona-a'n Leeds United a champion pui. Whites chairman Bill Fotherby-a'n Man United chairman Martin Edwards biain Denis Irwin lak an dil.

Man United-in Irwin hralh an phal lo a, remchangah lain Eric Cantona lak an dil ve thung. Leeds lamin mak takin hralh an phal a, a nungchang vang a ni ber. Amaherawhchu, Sir Alex Ferguson nen Cantona hi an inkawp rem a, a mizia danglam tak avangin Man United ṭantute a zunah an uai.

Cantona hian Premier League match 156-ah goal 70 a khung a, asssists vawi 56 neiin Man United vawi li a champion pui. "Kum 1966 hi English Football tan kum ropui a ni a, Eric-a pian kum a ni," tiin an sawi ṭhin a, kum 1966 hi England-in World Cup nomawi an chawi ṭum a nih avangin he thu hian Cantona ropuizia a sawifiah.

Keane hi Cantona ang thoa mi bik a ni a, kum 1993 khan Nottingham Forest aṭangin British record fee-in Manchester United hi a zawm. Kum 49 mi Keane hian league match 366 aṭangin goal 39 a khung a, assists vawi 33 neiin Premier League nomawi vawi sarih a chawi a ni.

United number 7
French forward Cantona hian George Best leh Bryan Robson-te larpui Man United number 7 hain a rawn tih lar belhchhah a, kawr nghawng ti pir vahin a ha a, Eric-a hre tawh phawt chuan an mitthla thei nghal ang.

Cantona hian goal ropui tak tak a khung a, chung zingah chuan 1996-a Sunderland lama a khung khan hriat zui a hlawh lehzual. Hetih hunlaia United captain hian ṭha taka a lakluh hnuah box pawn aṭangin a chip lut a, a goal khung lawm nan a hawi 'champ' nghal. A bul aṭanga tawp thlengin a fuh vel vek.

French forward chanchinah Crystal Palace ṭantu a 'kungfu kick' hi sawi hmaih theih a ni lo. January 25, 1995 khan Cantona hian red card a hmuh hnuah amah au eltu Palace ṭantu chu chiang takin a tlawh a, thla riat chhung an hrem phah hial.

Pa ngaihnawm
Player a nih lai aṭanga chanchin ngaihnawm tawh Cantona a la danglam lo a, a chanchin a la ngaihnawm reng.

Kum 54 mi Cantona chuan, "Player 30 dawn thlan theih tur an awm. Kei chu ka danglam a, pakhat chauh thlan tur chu ni se keimah ka ni ang. Midang zawng chu player ropui an ni a, kei chu ka danglam," tiin player 25 aṭanga thlanchhuah a ni chu mak a tih loh thu a sawi.

Man United legend chuan sawi chhunzawmin, "Football ka khel a, nuam ka ti a, ka hmangaih a, football khelh hi ka naupan lai aṭanga ka châk ber a ni. England-a inkhelh hi ka duhthusam a ni a, tu pawhin Premier League-a khelh an châk ang.

"Player, manager leh fans ropui tak nei team-a ka tel thei hi vannei ka inti hle. Ka sulhnu ka thlir kir a, ka duhthusam ang mai a ni. Manchester United-ah khan kan champion ringawt lo a, rilru ṭha tak pu chungin kan champion. Matt Busby hunlai ang thoin kan hun lai khan kalphung nghet kan nei a ni," tiin a sawi.