Liverpool hma hun hril tur Burnley

Premier League-ah match hnih chiah khelh tur a awm tawh a, Liverpool tan season thara Champions League khel turin match hniha chak ngei ngei a ngai.

Merseyside club hian zanin dar 12:45-ah Burnley an lenchilh dawn a, May 23 zanah Crystal Palace chu an mikhual leh bawk ang.

Liverpool vanneihna chu nizana an elpui Leicester City leh Chelsea an inkhel kha a ni a, team pakhat zawk talin point an hloh dawn avangin season thara an dinhmun tur chu an kutah a innghah phah - he thu buatsaih a nih lai hian result kan hre hman lo.

Reds manager Jurgen Klopp-a'n, "Kan kutah engkim a innghat a, hei hi kum hnih thum liam ta maia kan awh em em ṭhin kha a ni," tiin a sawi a, he thu hi vannei taka West Brom (2-1) an hneh hmaa a sawi a ni.

Mipui hmaah
UK sorkarin Covid-19 khuahkhirhna dan a thlahdul ṭan a, infiamna khawvel chu a hlawkna teltu zinga mi an ni - Premier League tawp match hnihah pawh entu an awm thei tawh dawn.

Sorkar ruahmanna ang chuan fan-te hi 10,000 emaw 25%, stadium len dan a zirin a hmunah inkhel an en phalsak a ni. Hemi awmzia chu mi 20,000 lenna stadium-ah chuan fans 10,000 aiin stadium-a leng zat 25% (a tlem zawk zel) in inkhel an en ang.

Burnley stadium-a len loh avangin a hmunah mi 3,500 bakin inkhel an en thei dawn lo a, chutihrual chuan away fans-in inkhel an en theih dawn loh avangin heti zat lek fans pawh hi mikhual team tan chuan buaina tham an ni.

Hriat tel tur chu Burnley hian January khan Ashley Barnes-a penalty hmangin Anfield-ah Liverpool hi 1-0 in an lo barakhaih tawh a, mahni mualah, fans nena inkhel tur an nih avangin chak an beisei ang.

Liverpool buaina
Tun season-a Liverpool buaina chu hliam hi a ni a, Baggies laka an bench kha en ila, an zuamawm hle - kum 19 mi Leighton Clarkson kha Premier League la khel ngai lo a ni a, Ben Woodburn-a'n season hnih chhungin Reds tan match khelh a nei tawh lo.

Xherdan Shaqiri leh Georginio Wijnaldum chu bench-a player langsar an ni a, Shaqiri hi hliamin a tihbuai reng avangin tun season-ah ngai a la awh lo a, Wijnaldum lah season tawpa chhuak tur anga sawi a awm reng avangin expert-ten club tana rilru pe tawk tawh lo tia an sel a ni.

A tawi zawnga sawi chuan Baggies nen 1-1 a an inhnehtawk lai pawh khan, bench aṭanga game thlak danglam tura luhtir tur an awm lo a, tuna Liverpool hi season hmasa lawka Liverpool kha an ni tawh lo.

Manchester United an hneh ṭumin Diogo Jota a inhliam leh a, Portuguese forward hi zaninah pawh a inlan thei dawn lo - Mohamed Salah, Roberto Firmino leh Sadio Mane-te an inkawp leh dawn tihna a ni.

Buaina lo kiang la
Liverpool inhliam 'list' en ila, Nilaini zan inkhawm tui tham zet an awm a, Jota bakah captain Jordan Henderson, defender Joel Matip, Joe Gomez leh Virgil van Dijk-te chu season tawp thleng lo kir tawh lo turte an ni.

He thu buatsaih a nih lai hian midfielder James Milner, Alex Oxlade-Chamberlain leh Naby Keita-te dinhmun a la hriat loh a, Liverpool-in tlarhnung inhliam an ngah avanga January-a an lakluh defender pahnih Ben Davies leh Ozan Kabak-te chu season tawp thleng an inlan thei tawh dawn lo bawk.

Hei vang hian Reds-in tlarhnung laiah Nathaniel Phillips leh Rhys Williams an rin a ngai a, Nat hi Klopp-a'n loan hmanga a hawh Kabak lak ngheh ṭul loa a hriat phahna khawpin hma a sawn a, Rhys erawh rin a la hara.

Kum 20 mi defender hi season hmasa lawka English sixth division khel a ni a, a tan chuan VVD leh Gomez-te hmun ruak hnawhkhah chu a harsa a ni - Burnley tana goal 12 khung tawh Chris Wood-a'n a zuam ang.

A hming Salah
Burnley hi Leeds United laka 4-0 a tlawm hlim an ni a, an tlarhnung a pherh tih hrilh nawn kan ngai lo. Liverpool tan Salah a pawimawh dawn tihna a ni a, Burnley tan Egyptian forward hi ven bik a sual lo ang.

Salah hian tun season Premier League-ah goal 22-a khung tawh a, Harry Kane nen anni aia khung hnem an awm lo - goal khung châka tuihal reng Salah-a'n Kane tlanchhiatsan a duh ang tih a chiang a, Burnley lakah goal khung a tum dawn.

Firmino-a'n United laka goal hnih a khung hnuah ngai a awh chho leh ṭan a, Brazilian forward hi ngaihthah a thiang lo. Hetihrual hian Mane-a'n ngai a la awh lo tih Baggies lakah a lang a, Senegalese forward hian insiamṭhat nan Burnley hman a tum ang.

Liverpool-in United leh Baggies an hneh lai en chuan, hliam vangin an ṭhat dan angin ṭha lo mah se an 'fighting spirit' kha an nei let leh ta niin a lang a, Burnley hian January-a an hneh tawh Liverpool ang khan an en a nih chuan an tisual dawn.