Mourinho-a'n Guardiola a hneh Spurs tan Champions League rim a nam

Jose Mourinho-a'n chak turin 'bus park' a hreh lo a, Pathianni zan khan Tottenham Hotspur-in Premier League champion lai Manchester City 2-0 in an hneh.

 

Pep Guardiola hote an chak loh avangin hmahruaitu Liverpool chu khelh zat inangah point 22 in an pha lo a, Reds champion hun hi 'official' a puan hun chauhin a dang tawh. Spurs erawhin Champions League khel turin beiseina nung an nei a, Chelsea an phak lohna chu point li chauh a ni.

Tottenham-in goal venhim an hreh lo a, Man City-in ball chang tama goal khung an duh. Premier League club ṭha pahnih enkawltute hi manager ropui Jose Mourinho leh Pep Guardiola te an ni.

Mourinho hian tun hma aṭangin 'bus park' a lar pui a, 2010-a Champions League-a Inter Milan a champion-pui ṭum pawhin semifinal-ah Pep-a enkawl Barcelona a hneh. Tun ṭuma an inkhelhna hi Tottenham Hotspur stadium a ni chungin Portuguese manager hian a khingpui team a hrechiang a, goal venhim chu hna hmasa berah an dah.

Spurs-in goal venhim an tum tih lanchianna chu defender Japhet Tanganga pawh tlan chhuak loin goal venghim turin a insawrbing a, Man City laka point thum hlu tak an hlawhchhuah avangin sawisel theih a ni lo. Chutihrualin Mauricio Pochettino hnuaia Spurs nen chuan a danglam ta hle, Tottenham ṭantuten team dang lakah erawh  attacking game an beisei ang.

Man City-in tun season-ah player hliam an ngah avangin an khelh ṭhat ṭumah pawh a tawp an khar fuh ṭhin lo a, Spurs nen pawh a danglam lo. Mourinho-a'n goal venhim tumin tlarhnung a rem phui chungin Man City lakah erawh a phui tawk lo a, Portuguese manager game plan fuhzia fak chiam aiin Pep-a naute vanduai vangah a ngaih theih zawk.

Sergio Aguero-a'n goal ban a pet per bakah Argentine forward hian hnai tak aṭangin a  hlah. Man City forward hian a tihsual thup nan Serge Aurier lak 

aṭangin penalty a hlawh chhuak a, Ilkay Gundogan-a'n petin Hugo Lloris-a'n a dansak. 

Penalty aṭanga ball per hi Raheem Sterling-a'n khawih fuh hmasain French keeper hian English winger hi a bawh tluah ngaih theih mah se VAR hmanga ennawn a nih hnuah penalty pek nawn a ni lo.

Man City vanduaina belhchhah turin minute 60-naah Oleksandr Zinchenko hnawhchhuah a ni a, Spurs-in an tamna hmang ṭangkaiin Steven Bergwijn leh Son Heung-min te hmangin 2-0 in hnehna an chang.

Spurs-in PSV aṭangin Steven Bergwijn an lalut a, Dutch winger hian club thar tana a khelh hmasak berah goal a khung. Minute 63-naah Lucas Moura-a'n fing taka a ball pek chu Bergwijn hian a awma la thlain ball-in lei a thlen hmain a volley goal nghal - pound maktaduai 27 man a nih chhan a pholang. 

Bergwijn hi minute 70-naa an lakchhuah pawhin standing ovation pek a ni a, Mourinho pawhin, "Kha aia ṭha kha a awm thei chuang lo. A fing a, a goal kha a class bawk," tiin goal hmahruai  khungtu a fak. 

England a awm ṭantirha 'The Special One' inti ngam ngat Mourinho a la danglam reng a, point thum an hlawhchhuah avangin a ngaihdan a sawhsawn phah lo. Spurs manager chuan, "Referee Kevin Friend chauhin Raheem Sterling red card a nih loh chhan kha a hria ang. Darkar khat chhung player tam zawk ni ila inkhel kalhmang a dang khawp ang," tiin referee thutluknaah a lawm lo.

Sterling hi minute 12-na lekah Dele Alli tlawh vangin red card hmu thei dinhmunah a ding a, yellow card chauh a hmu. First half tawp hmain Sterling hian penalty a beisei leh a, referee-in penalty-ah a ngai lo. Mourinho thlirnaah erawh English winger hian penalty a hlawhchhuah loh chuan tluk der vangin yellow card vawi hnihna hmu 

turah a ngai.

Manchester City-in Premier League an duh a, chutihrualin Pep Guardiola duh zawk erawh Champions League nomawi a ni. Spanish manager chuan, "Man City hi Champions League ka chawipui lo a nih chuan hlawhchhamah min ngai ang," tiin Spurs an hmachhawn hmain a sawi a, an chak loh avangin Europe inelna sang berah an insawrbing chho ang.

Guardiola chuan, "Kan khel ṭha a, kan chak lo. Goal zawnah vawi hnih an pet a, a goal ve ve. Kan vanduai ṭum a thleng leh a ni," tiin an khelh ṭhat ngaihtuaha result an neih ṭhat loh thu a sawi.

 Ngaihnawm

•    Jose Mourinho hian Pep Guardiola hi team pali Inter Milan, Real Madrid, Manchester United leh Spurs te hmangin a hneh. 

•    Portuguese manager hian Guardiola hi vawi ruk a hnehna chiah a ni a, amah aia Guardiola team hneh ngun chu Jurgen Klopp a ni. Liverpool manager hian Pep-a enkawl team hi vawi riat a hneh tawh.

 February 2, Pathianni

Tottenham    2 - 0    Manchester City

TOT : Steven Bergwijn 63'; Son Heung-min 71'

Burnley FC    0 - 0    Arsenal