Lianzuala leh Apuia telna India-in Doha pan

World Cup qualifier khel tur Indian football team chuan nimin tlai khan Doha an pan a, Blue Tigers squad-ah hian Chennaiyin FC forward Lallianzuala Chhangte leh NorthEast United midfielder Lalengmawia (Apuia) te an tel.

Player 28 zingah India captain Sunil Chhetri pawh a lo kir leh ta a, Bengaluru striker hian March-a international friendly match pahnihah Covid-19 a kai avangin India jersey-a ha thei lo a ni.

India hian Qatar-ah hian match thum an khel dawn a, June 3-a an match hmasa bera Qatar nen an khelh hmain Doha-ah hian an inkhunghrang nghal ang a, midang tlawh pawh theih lohin practice an nei dawn a ni.

Blue Tigers hian June 7-ah Bangladesh an hmachhawn zui a, June 15-ah Afghanistan nen an inkhel leh bawk ang. World Cup qualifier hi home & away-a khelh tur a ni a, mah se Covid-19 vangin India awmna group E-a khelh hmabak la awm chu Qatar hian a thleng vek dawn a, India match thum khelh tur pawh hi Qatar-ah vek a ni dawn.

World Cup qualifier-a match nga an khelh tawh aṭangin India hian point thum chiah an hlawh chhuak thei a, World Cup 2022 khel turin an tling thei tawh lo.

Hetihrual hian India tan group-a a ti ṭha pathumna nih theihna erawh a la awm a, pathumna hi an ni thei a nih chuan Asian Cup 2023 qualifier third round an lut nghal ang–India tan khelh chhan a la awm tihna a ni.

Indian player-te hi May 15 aṭang khan Delhi khawpuiah an inkhung hrang tawh a, RT-PCR Covid-19 test-ah an negative vek bawk.