A ṭha zawk ka beisei–Federer

Roger Federer-a'n beisei leh duhthusam angin clay court season bul a ṭan thei lo a, tunah hlawhtling nghal lo mah se rilru leh taksa lamah hmasawnna neih theih a beisei thu a sawi chhuak.

Thawhlehni zan khan Geneva Open-ah Federer hi Pablo Andujar nen an inkhel a, world number 1 hlui hi 6-4, 4-6, 6-4 in a chak lo. A vanglai pawha inkhelh harsa a tihna clay-ah chuan atan result mak a ni hran lo.

Grand Slam vawi 20 champion tawh Federer hian 2020 Australian Open hnu lamah tournament vawi hnih a khelh ve lehna chiah a ni a, tun hnai thla 15 chhung hian a inkhelh tlem bakah a hliam vawi hnih an zai bawk.

Kum 39 mi Federer chuan, "Khatiang aia ṭha zawk khan khel thei tur niin ka inhria, a nihna takah chuan tournament ni loin practice match khel ang chauh ka ni. Court chhunga ka kir leh hi a lawmawm a, ka chak lo erawh a lawmawm lo.

"Pawn lam aṭanga inkhel lo entu tan chuan a hmuhnawm lo viau mai thei," a ti a, tun thla tawp lama khelh tur French Open khelh a tum a, chumi hnuah grass court season an hmang ṭan leh ang.

Wimbledon vawi riat champion tawh Federer chuan, "A nihna takah chuan ka tan hi chuan grass court aṭang hian season a inṭan ṭhin, chumi atan chuan a ṭha thei ang bera inbuatsaih a pawimawh," a ti.

Season hmasa khan Federer hian Wimbledon khelh a tum a, mahse hri leng vangin an khel thei lo–indopui pahnihna hnua a vawi khat nan Wimbledon an ṭhulh a, kuminah chuan hlawhtling zawka neih an tum.

Federer hnehtu Andujar hi kum 35 mi a ni tawh, world ranking lamah 75-na ni daih mah se clay court-a inkhelh thiam bik a ni–tennis a khelh hunchhunga nomawi pali a chawi tawh chu clay-ah vek a ni.