Playoff khel turin Boston Celtics an tling

Boston Celtics chuan Washing-ton Wizards lakah 118-100 in hnehna an chang a, basketball inelna sang NBA playoff khel turin an tling chiang ta. Eastern Conference lama pahnihna Brooklyn Nets nen an intawng leh ang.

Nimin zing NBA Play In Tournament inkhelah Celtics tan Jayson Tatum chuan point 50 a nei thei a, point 29 neitu Kemba Walker-a'n a thlawp ṭha hle bawk; quarter pali an khelh zinga pathumah chungnung zawkin an chak nuamsa.

Chak lo Washington hi regular season bikah khan Eastern Conference-ah pariatna an ni, season dang ang chu ni se playoff khel turin an tling chiang ang. Kuminah erawh kalphung an siam thar avangin 'play in' an khelh hmasak a ngai.

Zirtawpni zingah Washington hian table-a pakuana luahtu Indiana Pacers an hmachhawn leh dawn a, a chak zawk hian playoff hmunruak an hnawhkhat ang a, playoff-ah chuan conference hmahruaitu Philadelphia 76ers an hmachhawn leh ang.

Tukin zing hian Western Conference lamin 'play in' hi an khelh chhunzawm ve thung dawn. Champion lai Los Angeles Lakers leh Stephen Curry awmna Golden State Warriors te an inhmachhawn dawn, a hmuhnawm ang.