Champion thar Man City an tlawm

Brighton & Hove Albion-in Thawhlehni zan khan Premier League champion thar Manchester City 3-2 in an hneh. Pep Guardiola hoten Champions League final an la khel dawn a, an hmachhawn tur Chelsea ṭum hnih ngawt an hneh tawh loh hnua Seagulls laka an tlawm leh avangin an inrintawkna a hniam phah ngei ang.

Amex Stadium-a inkhelah Man City-in Ilkay Gundogan hmangin hma an hruai a, Joao Cancelo hnawhchhuah a nih hnuah pawh player 10-a khel chungin Phil Foden hmangin goal an khung. Amaherawhchu Premier League leh League Cup champion kawp thei khawpa team ṭha City hian goal hnih an hum thei lo.

Brighton-in Leandro Trossard, Adam Webster leh Dan Burn hmangin an chhanglet a, 3-2 in an lehthal. Graham Potter chuan Man City an hneh theih chhanah Brighton ṭantute an ṭangkai thu a sawi.

Champion thar
Inkhel an ṭan chauh a, Man City-in an goal nawr nasa berah goal an khung nghal. Minute hnihnna lekah Riyad Mahrez-a'n mual vei lamah a thiam thil a pholang a, ball a chawh kual zawhah a ball vawrhluh ṭha zet chu Gundogan-a'n a tauh lut.

Minute 10-na lekah Joao Cancelo a chesual a, box pawnah Danny Welbeck goal khung tur a ti tlu. Welbeck hmaah hian keeper Ederson chiah a awm tawh avangin Cancelo hi a hnawhchhuah a ni.

Man City-in player 10-a an khelh hnuah pawh champion zia an lantir. Phil Foden-a'n minute 48-naah halfway line thlen hma ṭangin a khalh phei char char a, box chhung khalh thlengin Man City goal hnihna a khung.

Brighton an tho
Brighton-in player 10-a khel Man City hneh loh an tum lo a, chak inbeisei an nei tlat. Minute 50-naah Leandro Trossard-a'n Man City defender te bum kualin goal ṭha bik a khung.

Trossard goal mawi hian Brighton a ti phur lehzual a, inrintawkna a pe tel bawk. Minute 72-naah Pascal Gross-a cross chu Adam Webster-a'n a tauh goal a, an inhnehtawk ta chiah.

Seagulls-in goal thumna khung tumin an nawr chhunawm a, an huaisen rah an seng. Minute 14 chauh hun a awm tawh tihin Dan Burn-a'n Brighton tana a goal hmasa ber a khung a, Brighton-in April 1989 hnua a vawi khat nan Man City an hneh.

Eng nge an sawi?
Man City manager Pep Guardiola chuan, "Player 11 ve ve a khelh pawhin Brighton hi hmachhawn an harsa a, player 11 leh 10 phei chuan a harsa lehzual a ni. 2-0 a nih hnu khan goal kan chhuah hma mah mah a, amaherawhchu kan chauh avangin kan tlin ta lo," tiin red card vanga khelh a harsat thu a sawi.

Man City tana chanchin lawmawm lo erawh inhliam vangin Gundogan lakchhuah a ngai a, German midfielder dinhmun hi la hriat loh mah se ngaihtuahawm ni turah an ngai lo. Newcastle nena hattrick siamtu Ferran Torres pawh Cancelo-a'n red card a hmuh avangin minute 15-na lekah an thlak.

Spanish manager Guardiola chuan, "Final hmain kan insiamṭhat a ngai," tiin Champions League final a ngaih pawimawh thu a sawi. Man City hian May 23 zanah Everton an mikhual dawn a, inkhelh banah nomawi an chawi dawn. Club legend Sergio Aguero pawh Toffees nen hian inlan ngei tura ngaih a ni.