Serena zinkawng a tawp

Hnehna nen bul ṭan mah se Serena Williams a kal thui thei lo. Thawhlehni zan khan Serena hian Emilia-Romagna Open last 16-ah Katerina Siniakova a hmachhawn a, inkhel inhnehtawk takah 7-6 (7-4), 6-2 in a chak lo.

American star hian a service a hum ṭha tawk lo, ṭum li ngawt a hloh. Inhnehtawk viau mah se seeded pakhatna Serena hian hun pawimawh laia point a hloh zawk avangin darkar khat leh minute 37 chhungin world number 68 lakah a tlawm.

Kar hmasa khan Serena hi Italian Open-ah a inlan a, hneh nei loin a tla. Parma khawpuia inelna siamtu ten duhsak takin wildcard an pe zui a, seeded pakhatna hial pek ni mah se beisei a phak thei ta chuang lo.

Kum 39 mi Serena hi tun thla tawpa khelh tur French Open-ah a inlan zui dawn. American star hian Grand Slam nomawi 23 a nei tawh a, major title la hnem ber Margaret Court (24 titles) nihrual a tum leh ang.

Australian legend Court-i nihrual hi thil awlsam a ni lo–Serena hian Grand Slam final a khelh hnuhnung pathumah a chak lo vek, Paris khawpuia hlawhtlinna chang tur chuan vanneihna a mamawh tel dawn a, thapui a thawh a ngai dawn tihna a ni.