Serie A Torino an him–Benevento, Crotone leh Parma an tla
Italy rama football inelna sang ber Serie A aṭanga tla hniam tur team pathum a chiang ta. League match hnuhnung ber an khelh hmain Benevento, Crotone leh Parma te chu an tla fel tawh; season tharah Serie B an khel ang.
Thawhlehni zan khan inkhel pakhat a awm, tla thei dinhmuna la ding Torino chu Lazio nen 0-0 in an inhnehtawk a, point khat hlu tak an hlawh chhuah avangin Torino hi Serie A khel zel turin an him ta chiah.
Vanneihna
Lazio hian season thara Europa League an khel dawn a, team ṭha zawk an ni. Point thum hmuh tum chungin Tornio an mikhual a, team ṭha lo zawk lakah harsa lutuk loin an chak tura ngaih a ni–mahse rin lawk ang ngawtin thil a kal lo.
Tun ṭum fixture hi a tirah chuan March 2-a khelh tur kha a ni, mahse hrileng vangin a hun pangngaiah khan an khel thei lo. Season tawp dawna an khelh tak zawk avangin a boruak pawh a danglam phah hle.
Mualneitu Lazio lamin ball possession 72% zet nei mah se an vannei tawk lo. Hun tawp hma minute ruk chauh awm tawhah goal khung theihna hun ṭha bik an nei–amaherawhchu an penalty hmuh chu Ciro Immobile-a'n chhuihin goal ban a pet per.
Hamrik hnuhnung a rik hma lawkin remchang an insiam leh thei a, mahse hetah pawh hian an la vannei chuang lo. Midfielder Manuel Lazzari-a'n hnai tak aṭangin woodwork a tauh per a, point khatah an lungawi a ṭul.
Nicola a lawm
Torino coach Davide Nicola chuan an him tak avangin a lawm thu a sawi. Nicola hian January 19 khan Marco Giampaolo thlakin team enkawl hna a thawk ṭan a, khatih lai khan tla hniam thei dinhmunah an ding.
Nicola chuan, "Tun season zet chu hriatthiam a harsa ngei mai. Tluk leh din fawmin hun kan hmang a, a tawpah erawh kan him ta. Thil fuh loh leh dik tawk lo kan nei a nih pawhin tun hi chu hlim taka awm hun a ni.
"Torino hi club hlun leh ropui a ni a, player ṭha tak tak phenah hian fans an awm reng bawk. Kan match hnuhnung pahnihah kan tlawm avangin kan dinhmun a khirhkhan hman hle, tun ṭumah khan kan theihna zawng zawng kan hlan," a ti.
Tihpalh unaupa
Lazio coach Simone Inzaghi leh Benevento enkawltu Filippo Inzaghi te hi unau an ni a, Lazio khan hnehna chang ni se la chuan a unaupa enkawl club hian inhamtang turin beiseina an la thei thei ang–mahse chu beiseina chu a thamral ta si.
Inzaghi chuan, "A unaupa Inzaghi ka khawngaih a, pawi ka ti hle. Mahse inkhelah khan kan theihna zawng zawng kan hlan a, chak tumin bei mah ila goal kan khung thei miau si lo, kha kha football nihphung chu a ni ṭhin.
"Chak zawh loh vangin lungngai mah ila kan season hman danah erawh lawmna tur a awm. Season thara European football khel turin kan tling a, lungngaihna kara chanchin ṭha chu a ni," tiin a sawi.
Inzaghi hma hun
Kum 2016 aṭangin Simone Inzaghi hian Lazio a enkawl ṭan a, a club hi Coppa Italia leh Italian Super Cup a lakpui tawh, a contract neih lai hi season thar tawp ruala zo mai tur a ni tawh–a hma hun a chiang lo mek.
Inzaghi chuan, "Lazio-ah hian hun rei tak chhung ka awm tawh a, ka hma hun chungchang chu karleh lamah inbiakna kan nei ṭan turah ka ngai. Club nen hian kan inzah tawn em em a, kan tana ṭha tur ve vein thutlukna kan siam ang," a ti.
Manager nghet nei loa awm mek Tottenham chuan Inzaghi hi an ngaihven nia sawi a ni a, a club awm mekna hian hun rei zawk atana chelh an duh a nih chuan sum an thehchhuah tam hret chu a ngaih hmel.
