France-in Benzema a ko kir : An hlawkpui dawn nge an chhiatpui dawn?

Euro 2020 khelh hun a hnai a, European football-a ram leh ram inelna sang ber hian chanchin ngaihnawm a nei ṭan nghal der.

France chuan Real Madrid striker Karim Benzema chu Euro khel turin an ko kir a, kum ruk dawn an ram team tana a khelh loh hnuah French striker hian a hming chhe tawh sa thaibo turin hun duhawm a nei leh ta.

Kum 33 mi Benzema hian kum 2015 khan ram tana a khelhpui midfielder Mathieu Valbuena chu a 'blackmail' a, a thiltih avang hian ram tan koh a ni leh tawh lo–kum 2021 a herchhuah meuh erawh chuan season duhawm tak hmangtu Benzema en kan reng theih a ni ta lo.

Les Bleus coach Didier Deschamps chuan Thawhlehni zan khan France squad hi a puang a, player koh loh zingah Arsenal striker Alexandre Lacazette leh Manchester United forward Anthony Martial-te chu langsar zual an ni.

Hmana thil thleng
Kum 2015 khan Benzema hian ram tana a khelhpui Mathieu Valbuena chu phone hmangin a bia a, a 'sex tape' tih darh a duh loh chuan a naupan laia a ṭhianpa hnenah pawisa pe turin a ti.

November 2015 khan French Police-ten Benzema an man a, thil thleng chungchang chhui a nih lai hian hetihlaia France prime minister Manuel Valls chuan, "Infiammi chu entawntlakin a nung tur a ni a, a ti thei a nih loh chuan France team-ah a tan hmun a awm lo.

"Naupang tam takin ngaisang takin anni hi an entawn a, jersey pawl, France rawng ngei hatu an ni," a ti a, Benzema chet dan chu ram tana jersey ha tlak a nih loh thu a sawi.

French Football Federation president Noël Le Graët pawh a ṭawng ve nghal a, Le Graet chuan, "Benzema hi hmun harsa tak aṭanga seilian a ni a, anin hma a sawn laiin a ṭhiante erawh an nunhluiah an la tang tlat thung. Khawvel huap star lar a ni a, a ṭhian hluite a thlah lo hi a pawi a ni," a ti.

Mangṭha France...
France Prime Minister meuhin Benzema tan an ram team-ah hmun a awm loh thu a sawi a, French football hotupa Le Graët chuan, "Midang ang thoin thinlung ka nei ve a, mi hrem hi nuam ka ti lo.

"Mahse, Benzema hi ram tan inlan tura koh zui chi a ni lo a, thil a danglam thut a nih loh chuan Euro 2016-ah a inlan lo ang," a ti a, ram lama Benzema career chu a tawp zuiah ngaih a ni.

Benzema a lungawi thei lo. Algerian thisen kai, Muslim sakhua zuitu hian, "Deschamps chu chi inthliarna chawisangtute hmaah a bawkkhup ta a nih hi," a ti a, a hnam leh sakhua vanga ram tana koh ni loah a inngai.

October 2015 khan Benzema hian France tan Armenia nen friendly match an khelhnaah goal hnih a khung a, hemi hnuah erawh ram tan a inlan leh tawh lo–Les Bleus tan match 81 khelin goal 27-a khungsak hman.

Hello France
Thawhlehni khan khawthlang media zingah France squad-a Benzema kir tur thu sawi rik a awm ṭan a, zan a nih meuh chuan French striker hian social media lama a profile-ah France tana khel footballer-a nih thu a tarlang tel.

Zanlai a thleng a, France-in squad an puang a, Benzema hming a lang tel. Kum ruk dawn hnuah ram tana koh kir a ni ve leh ta–tun season-ah Real Madrid tan match 45 khelin goal 29-a khung a, assist vawi riat a nei.

France manager Deschamps chuan, "Vawiin leh naktuk hi a pawimawh ber chu a ni," tiin Benzema tihsual hlui an theihnghilhsak thu a sawi.

Deschamps chuan, "Kan inhmu a, kan inbia a, he thutlukna siam tur hian uluk takin ka ngaihtuah a ni. Benzema ka mamawh a, anin France hi a mamawh bawk," a ti zui.

Misual Benzema
Benzema hian Valbuena laka chanchin duhawm lo a neih hma hian sawi chhawn tlak loh khawpa chanchin duhawm lo a lo nei fo tawh a, midang sawisel kawngah a insum lo ṭhin hle bawk.

Benzema hian March 2020 khan Olivier Giroud chu social media lamah langsar takin a lo kap tawh a, "Kei chu Formula 1 ka ni a, Giroud erawh go-kart a ni," a ti–Giroud-a ngai bik lo a, Chelsea striker hian, "G-kart ka ni mai thei a, mahse, World Cup nomawi ka chawi a ni," a ti ve sak!

Antoine Griezmann pawhin Giroud hi chhanin, "World Cup nomawi chawi a pawimawh," a ti sak a, heng thawnthu hlui zawng zawng ngaihtuah hian France squad-a Benzema koh hi a fuh ber em, tih chu zawhna awm thei a ni.

Benzema ṭhatzia hrilh nawn kan ngai lo a, chutihrual chuan he striker tel lo hian world champion an ni thei–an ram FA President, Coach leh player-te langsar taka lo sawisel tawhtu striker hi team ti ṭhatu nge a nih ang a, tichhetu a nih chu hunin a hril thuai ang.

France an ṭha tawk!
Benzema koh kir a nih laiin France player langsar zingah ram tana inlan tura koh loh an awm nual a, Lacazette leh Martial chiah rilru naa indawm kun an ni bik lo.

Barcelona-a tla tlum tawh lo centre back Samuel Umtiti, Manchester City left back Benjamin Mendy, Real Madrid left back Ferland Mendy leh RB Leipzig centre back Dayot Upamecano-te chu tlarhnung lama koh loh langsar an ni.

Hmanni lawka European football-a player 'hot' ber pawl, Real Betis forward Nabil Fekir tan pawh hmun a awm lo a, Arsenal leh Liverpool nen sawi zawm ni mah se Lyon midfielder Houssem Aouar-a'n Deschamps-a mit a tlung lo.

Rawlthar sawi hlawh tak Eduardo Camavinga pawh koh zingah a tel lo a, Rennes midfielder hi kum 18 mi lek a nih avangin chance erawh a la nei dawn chauh–France-in an koh loh player ringawt pawh en ila, champion tum pui ngam khawpa ṭha an ni.

Benzema thawnthu
• November 2015 khan Benzema hi Valbuena vaua puh a ni a, ram tana a khelhpui midfielder hi a ṭhianpa Karim Zenati account-a euro 10,000 transfer turin a hrilh a, anih loh chuan a bialnu nena an chetna video-a theh darh tur thu a sawi.
• Benzema-a'n puh a nihna a pha a, Valbuena chuan Benzema hian a phone ngei thu a sawi a, hetihrual hian sum erawh chiang taka sawilang loin Zenati be tur erawhin a hrilh thung niin a sawi.
• Euro 2016 squad-ah Benzema telh a ni lo a, hemi kum vek hian French striker-in puh a nihna hlihsak tura a ngenna chu court-in a hnawlsak.
• Benzema hi October 20 aṭanga October 22 thlenga court la hmachhawn leh tur a ni.

France squad
Goalkeepers: Hugo Lloris (Tottenham), Mike Maignan (Losc), Steve Mandanda (Marseille)
Defenders: Lucas Digne (Everton), Leo Dubois (Lyon), Lucas Hernandez (Bayern Munich), Presnel Kimpembe (PSG), Jules Kounde (Sevilla), Clement Lenglet (Barcelona), Benjamin Pavard (Bayern Munich), Raphael Varane (Real Madrid), Kurt Zouma (Chelsea)
Midfielders: N'Golo Kante (Chelsea), Thomas Lemar (Atletico Madrid), Paul Pogba (Manchester United), Adrien Rabiot (Juventus), Moussa Sissoko (Tottenham), Corentin Tolisso (Bayern Munich)
Forwards: Wissam Ben Yedder (Monaco), Karim Benzema (Real Madrid), Kingsley Coman (Bayern Munich), Ousmane Dembele (Barcelona), Olivier Giroud (Chelsea), Antoine Griezmann (Barcelona), Kylian Mbappe (PSG), Marcus Thuram (Borussia Monchengladbach)