Chelsea-in Leicester lakah phuba an la
Leicester City-in FA Cup final-ah Chelsea hnehin an champion a, Thomas Tuchel hoten Premier league-ah phuba lain Thawhlehni zan inkhel hmuhnawmah Foxes 2-1 in an hneh.
Stamford Bridge-a inkhelah hian Blues tan Antonio Rudiger leh Jorginho ten goal khat ve ve an khung a, Foxes-in Kelechi Iheanacho tan siphurh sut ṭhenin a tawp thlengin inkhel a hmuhnawm.
Chelsea-in an elpui Foxes an hneh avangin Champions League khel turin result dang an ngaihchan a ṭul lo a, match hnuhnung bera Aston Villa an hneh chuan a tawk. Leicester City erawh Tottenham Hotspur hneh ringawt a tawk lo a, Liverpool inkhel result-ah an innghat tel tawh ang.
Sa huai an ser
Thomas Tuchel-a'n chak ngei a tum a, a player thlan dan thlirin FA Cup final aiin an ṭha zawkah a ngaih theih. Goalkeeper Kepa Arrizabalaga aiah Edouard Mendy a rawn inlan a, Marcos Alonso aiah Ben Chilwell rawn lutin Hakim Ziyech aiah Christian Pulisic a lut ve bawk.
Brendan Rodgers pawhin chak nawn a tum a, James Maddison-a'n bul a ṭan a, Johny Evans a inhliam avangin Marc Albrighton chu wing back-ah awmin defence laiah Caglar Soyuncu, Wesley Fofana leh Timothy Castagne te an awm.
Pa vanduai Werner
Stamford Bridge-ah entu 8,000 an pung khawm a, Chelsea ṭantute vek an ni a, Tuchel-a hoten bul an ṭan ṭha hle. Ṭan phatah Timo Werner-a'n ṭha taka lalutin Ben Chilwell-a pe a, English left back shot-cross chu goal zawnah a kal lo a, Pulisic-a'n a tlawh pha lo chiah chiah.
Minute 18-naah Timo Werner-a'n box chhunga Youri Tielemans ball pet chhuak tur a tlawh khalh hman a, German forward hi box chhunga tluin penalty beisei mah se pek a ni lo.
Blues goal nawr a na zel a, minute 22-naah Timo Werner-a'n goal sirah a pet goal a, lawm avangin van lam a kawk nghal. Mahse, Werner hi a offside miau avangin pawm a ni lo.
Darkar chanve pelh hretah Werner-a'n a tauh goal-ah a inngai a, goal line a pelh miau avangin referee Mike Dean-a'n goal-ah a puang. Mah se maw! Werner a vanduai nawn. German forward hian nasa takin a goal khung hi lawm mah se a kut hmanga a tih goal a nih avangin pawm a ni lo.
RB Leipzig aṭanga Chelsea zawmtu Werner hian kumin (2021) league-ah goal hnih chiah a la khung a, goal hmaah a vanduai. First half bikah Blues an chungnung a, Mason Mount-a'n a chance ṭha hlah ve bawkin goal a lut lo.
A goal ta
Second half-ah erawh goal khung turin nghah rei a ngai lo, Ben Chillwell-a corner pet chu Antonio Rudger-a'n a su goal. Chelsea-in goal an khung a, inkhel an thunun bakah an vannei tel bawk.
Minute 65-naah Werner-a'n a rem dan zawng zawngin ball a khalh a, corner flag lam hawia ball a khalh lai chu Fofana-a'n a ti tlu. Referee-in freekick pangngai pe turin a ham a, VAR hmanga en let a nih hnuah box chhung a nih si avangin holam takin Chelsea-in penalty an hmuh phah.
Jorginho rawn pen chhuakin pressure sang takah Leicester City keeper Kasper Schmeichel bumin cool takin minute 66-naah Blues goal hnihna a khung. Chelsea hi chak tur chiangah ngaih theih tawh mah se minute 76-naah Foxes substitute Kelechi Iheanacho-a'n a chance ṭha neih hmasa ber chu goal-ah a khung a, inkhel boruak a nun phah hle.
Cho leh cho
Leicester-in beseina thar an neih hnuah team dang daih an ni a, substitute Ricardo Pereira cross ṭha zet chu Ayoze Perez tan goal khung ngeina tur niin lang mah se goal zawnah a pet tlat lo.
Injury time-ah Rudiger-a'n Chilwell tlawhtu Ricardo a nam a, buaina chhuak mah se player hnawchhuah an awm lo. Hun pek belh rei hret se chuan player kimin an khelh tluan theih a rinawm loh a, hun tawp lam boruak a sosang hle.
"Kan khel ṭha takzet a, mah se hna kan la zo lo. Match hnih khelh tur a la awm. Entu awm khan danglamna a siam a, min ṭantute hmaah kan khel ṭha takzet. Tunah chuan kan kutah engkim awm". - Thomas Tuchel, Chelsea manager
(Chelsea hian Aston Villa an hneh chuan season tharah Champions League an khel ang a, an chak ta lo a nih pawhin Champions League final-a Manchester City an hneh chuan Europe inelna sang berah hian an la tel tho ang)
"Theihtawp kan chhuah a, kan goal chhuah dan erawh a lawmawm loh. Corner aṭanga kan goal chhuah kha chu kan fimkhur loh vang a ni a, penalty kan chawi dan erawh a na takzet. Chutihrualin ka player-te'n theithawp an chhuah avangin ka chhuang hle. Season tharah Champoins League kan khel lo a nih chuan kan rilru a na dawn a, mahse theithawp kan chhuah zel dawn. Season ṭha tak kan hmang a, kan thlen chin hi a ṭha a ni". - Brendan Rodger, Leicester
(Leicester City hi season liam ta khan hun rei zawk a sang pali zingah awm mah se a tawpah panganaah an tla thla a, tun season-ah pawh season liam taa thil thleng bawk kha a thlen nawn leh a rinawm hle)