Low-a'n a thu a sut

Muller leh Hummels a ko
Germany-in nimin khan Euro 2020 khel tur player 26 an puang a, coach Joachim Low-a'n team ṭhatna tur bera thutlukna siamin Thomas Muller leh Mats Hummels te a ko tel.

Die Mannschaft hian FIFA World Cup 2018 group stage an patlang lo a, inelna zawhah Joachim Low-a'n player langsar pathum Thomas Muller, Mats Hummels leh Jerome Boateng te a koh tawh loh tur thu a puang.

Amaherawhchu Germany-in result ṭha an nei thei chuang lo a, Nations League hmasa berah chak an nei lo. A vawi hnihnaah playoff khel thei dinhmunah ding mah se Spain lakah 6-0 in an mualpho.

Low-a'n a thu sut duh loin tawnhriat nei ṭha player pathumte hi a ko duh chuang lo a, mah se an match hnuhnung ber World Cup qualifying-ah North Macedonia lakah 2-1 in an tlawm.

Germany an talbuai lai hian Thomas Muller-a'n Bayern Munich tan a vanglai hun a hmang chho a, season hnih chhung Bundesliga-ah assist ngah ber a ni. Hansi Flick hnuaia Bavarians-in nomawi chawi theih zawng zawng an chawi ṭumah pawh Muller hi a pawimawh hle.

Mats Hummels pawh Borussia Dortmund tlarhnung innghahna a ni a, tun season-ah DFB Pokal a champion pui bakah season tharah Champions League an khel dawn. Muller leh Hummels te hian Germany tana koh hi a phu a, Boateng erawh phu tho mah se koh telh a ni tawh lo.

Hummels chuan, "Kan ram Germany tana ka khel leh thei tur hi ka lawm a, ka inchhuang bawk," tiin twitter-ah a ziak. Muller pawhin Germany squad awmna thlak chu selfie puiin, "Ka lo kir e," tiin a ziak ve bawk.

Barcelona keeper Marc-André ter Stegen chu hliam vangin ko telh theih a ni lo a, captain Manuel Neuer thachhang dawl turin Bernd Leno leh Kevin Trapp te an awm ang.

Germany squad-ah hian Bundesliga champion Bayern Munich-in player pariat ngawt an thawh a, player pawimawh vek an nih phak bawk avangin Die Mannschaft hi Bavarians player-te kutah a innghat thui khawp ang.

Germany Squad
Goalkeepers: Bernd Leno (Arsenal), Manuel Neuer (FC Bayern), Kevin Trapp (Eintracht Frankfurt)
Defenders: Matthias Ginter (Borussia M'Gladbach), Robin Gosens (Atalanta), Christian Gunter (SC Freiburg), Marcel Halstenberg (RB Leipzig), Mats Hummels (Borussia Dortmund), Lukas Klostermann (RB Leipzig), Robin Koch (Leeds United), Antonio Rudiger (Chelsea), Niklas Sule (FC Bayern)
Midfielders/Attackers: Emre Can (Borussia Dortmund), Serge Gnabry, Leon Goretzka (FC Bayern ve ve), Ilkay Gundogan (Man City), Kai Havertz (Chelsea), Jonas Hofmann (Borussia M'Gladbach), Joshua Kimmich (FC Bayern), Toni Kroos (Real Madrid), Thomas Muller, Jamal Musiala (FC Bayern ve ve), Florian Neuhaus (Borussia M'Gladbach), Leroy Sané (FC Bayern), Kevin Volland (AS Monaco), Timo Werner (Chelsea)