Edinson Cavani goal a mawi
Thawhlehni zan khan Manchester United leh Fulham 1-1 in an inhnehtawk a, Edinson Cavani chuan goal mawi bik a khung. Uruguayan forward hian yard 40 aṭangin Cottagers keeper Alphonso Areola rawn tlan chhuak chu hmu fuhin mawi zetin a pet goal.
Old Trafford-ah entu 10,000 an pung khawm a, Cavani goal ropui hmu mah se Man United khelh dan erawh chhuan tur a awm lo. Fulham tan Joe Bryan-a'n minute 76-naah a tauh goal a, 1-1 in inkhel a tawp.
El Matador
Man United ṭantuten a vawi khat nan a hmunah ngei Edinson Cavani khel lai a hmu a, El Matador hming lem an vuah Cavani-a'n a thiamna lantir turin hun rei a mamawh lo.
Minute 15-na lekah David de Gea ball pet chhuah chu Bruno Fernandes-a'n kheng thawi feihin Cavani-a'n a um lut. Tlan pahin Cavani hian keeper Areolo awmna a thlir a, a ball um lai chu yard 40 aṭangin a pet nghal a, ball thlawk lai chu mipuiin an thlir ṭhap.
PSG keeper hlui Areola-a'n theihtawpin 'dive' mah se Cavani-a'n goal kilah tak ball a thawn luh avangin dan theih a ni lo. VAR hmanga an replay hnuah Cavani danglamna tak pholan a ni a, offside trap-a tang lo turin mawi zetin a insiam rem a, striker ṭha bik lo chuan an thiam ve lo.
Thlirna dang
De Gea ball petchhuah hi VAR thlirna aṭang chuan Bruno Fernandes-a'n a khawih a, hemi vang hian a offside lo. Chutihrualin Portuguese midfielder hian a khawih fuh chiah em tih erawh inhnialna a awm thei a ni a, a khawih fuh lo niin a lang zawk.
Fulham manager Scott Parker chuan, "Offside a nih loh chhan kha ka hre lo. Fourth official min hrilh danah chuan Fernandes khan a khawih loh chuan yard nga vel laia a offside tur thu min hrilh. Angle hrang hranga thlir khan Fernandes khan a khawih loh tih kan hmu a, VAR tihsual ni loin mihring tihsual a ni," tiin a sawi ve thung.
Beisei pha lo
Solskjaer-a hoten relegate tawh Fulham awlsam taka an hneh mai a rinawm a, amaherawhchu beisei angin Man United an khel chhuak lo. Harry Maguire-a awm lohna United tlarhnung a pawp a, first half-ah Victor Lindelof tlan peltu Fabio Carvalho-a'n keeper David de Gea chiah a hmachhawn hnuah a pet goal thei lo.
Second half-ah mualneitu an la insiam ṭha lo a, keeper De Gea-a'n Ivan Cavaleiro cross sual goal zawna kal chu ṭha zetin a dang. Minute 76-naah Fulham hun a inher chhuak ta a, dinglam aṭanga Bobby Decordova-Reid cross chu Joe Bryan-a'n a tauh lut.
Man United-in Mason Greenwood hmangin chak theihna hun ṭha nei bawk mah se an khelh dan thlirin 1-1 a inhnehtawk hi result awm tak a ni.
Insiamṭhat ngai United
Manchester United ṭantuten club neitu Glazer chhungkua an duh lohna an lantir chhunzawm a, Ole Gunnar Solskjaer-a'n Cottagers an hmachhawn hmain fan-te chet dan vanga khelmuala an rilru pek an harsat thu a sawi tawh.
Europa League final khel tur Man United hian match hnuhnung pangaah Aston Villa chauh an hneh a; AS Roma, Leicester City leh Liverpool an hneh lo. United boss Solskjaer chuan, "Fulham laka kan khelh dan hi min beng harhtu ni se, insiamṭhat kan mamawh," tiin an khel ṭha lo tih a pawm.
Manchester United hi Fulham nen inhnehtawk mah se Chelsea-in Leicester City an hneh avangin pahnihna an ni chiang tawh a, May 23 zanah Wolverhampton Wanderers nen league match hnuhnung ber an khel ang. Solskjaer-a hote hian May 26 zanah Villarreal nen Europa League final an khel dawn a, nomawi chawi turin insiamṭhat ran an mamawh hle.