A tawp nan Buffon-a'n nomawi a chawi

Juventus chuan Atalanta 2-1 a hnehin Coppa Italia champion an ni. Season tawp ruala chhuak tur goalkeeper Gianluigi Buffon chuan Old Lady player a nih chhunga a nomawi hnuhnung ber tur a chawi, manager Andrea Pirlo tan erawh team a enkawl hnua a title hmasa ber a ni thung.

Nilaini zan final inkhelh hmuhnawm takah Juve tan Dejan Kulusevski leh Federico Chiesa ten goal an khung a, midfielder Ruslan Malinovskyi-a'n khung ve mah se Atalanta tan a tawk zo lo, hun tawp dawnah defender Rafael Toloi chu hnawhchhuah a ni.

A hma boruak
Pirlo nauten season an hman ṭhat loh avangin mualpho hliahkhuh an ngai, a vawi 14 nana Coppa Italia nih tumin thapui an tawh. Atalanta erawhin 1963 hnua nomawi hmasa ber beisei chungin final an khel.

La Dea (Atalanta sawina) hian season hnih liam ta khan final an lut a, mahse Lazio an ngam lo. Hliam leh hrem tuar player langsar an awm lem loh avangin beisei an nei sang. Juve erawhin Alex Sandro (hrem) leh hliam vangin Leonardo Bonucci an chhawr thei lo.

Mapei Stadium chhungah entu mipui 4,300 an awm thei a, nikum March thlaa inkharkhip kalpui a nih hnuah tun ṭum hi Italy rama inkhel a hmuna entu an tam ber ṭum a ni, fans an awm miau avangin inkhelh hma aṭangin boruak a 'hot' nghal.

Inkhel chu
Atalanta striker palian leh tharam ngah Duvan Zapata chu defender Matthijs de Ligt leh Giorgio Chiellini te tan a hnawksak nghal a, goal zawnah erawh a pet thei lo. Jose Luis Palomino khung tur chu Buffon-a'n a lo dansak.

Cristiano Ronaldo-a'n penalty beisei mah se pek a ni lo, chawlhlawk hma deuhin Kulusevski-a'n goal mawi a khung. Juve winger hian buai nuaih karah Weston McKennie hnen aṭanga a ball hmuh chu a duhna takah 'cool' zetin a pet kual lut.

Chawlhlawk hmain Atalanta lamin Malinovskyi hmangin an sut. Remo Freuler-a'n amah vengtu Adrien Rabiot a paltlang hnuah Hans Hateboer rawn inrawlhin, ani hian Malinovskyi a siamsak - ani hian rang taka thutlukna siamin Buffon tan dan hman a ni lo.

A tawpah a lut
Team pahnihin goal khung chhunzawm tum mah se hun ṭha an nei thei lo ve ve. A zawna season hnih Serie A team zinga goal khung hnem ber Atalanta pawhin remchang an insiam thei lo - Zapata chuan penalty beisei mah se Ronaldo ang bawkin an pe bik lo.

Hnai taka Federico Chiesa pet luh tur chu keeper Pierluigi Gollini-a'n rang takin a lo dang a, Chiesa hian box chhung aṭangin goal ban a per per zui nghal dawp bawk. Italy international hi dan reng theih a ni lo, minute 73-naah ball la lut lehin Gollini rawn tlan hma mah se dan hman a ni tawh lo, chakna goal a khung.

Gian Piero Gasperini nauten an theihna zawng zawng an hlan a ngai tawh a, hun tawp dawnah Rafael Toloi hnawhchhuah a ni a, tun hnai season sarih chhunga a vawi nga nan Juventus chuan Coppa Italia an la chhunzawm.

Gigi tan nomawi
Gianluigi Buffon-a'n Juventus a chhuahsan tur thu a sawi hnua a match hmasa berah penalty a dang a, tunah Andrea Pirlo-a'n duhsak taka inkhel bul a ṭanna chu a ti hlawhtling - captain armband hrengtu Chiellini-a'n nomawi chawi turin Gigi hi a duhsak bawk.

Kum 43 mi Buffon chuan, "Hun hnuhnung hman dan atan chuan hetiang baka duhthusam leh hlimawm hi a awm thei tawh chuang lo ang, kan hlawhtlinna hi team leh fans vang a ni," tiin a sawi. Italian legend hian Coppa Italia nomawi hi vawi ruk a chawi tawh, a champion hmasa ber chu 1999 kha niin Parma tana a khelh lai a ni - Enrico Chiesa te nen an khelho. Tunah chuan Chiesa fapa Federico Chiesa goal khung hmangin Buffon-a'n nomawi a chawi!

A hma hun chungchang sawiin Buffon chuan, "Inkhelh chhunzawm chu ka la duh, mahse chumi tur chuan keimah ang maia hringnun hi maksak leh danglam takin a hman theih a ni tih ring ngam vetu an awm a ngai ang. "Football hi nuamti takin ka la khel thei a, chona thar hmachhawn zel hi nuam ka ti. Engtik niah emaw chuan inkhelh nuam ka tih loh hun a lo la thleng ang, chumi hunah chuan ka chawl tawh dawn tihna a ni," tiin a sawi, season tharah a inkhelh a la rinawm.

"Team ṭha pahnih inkhel a ni bawk a, a ropui ngei mai. Season ṭha takin hmang lo mah ila final ropui takin kan khel a, a tawpa hlim zawk kan ni hi a lawmawm takzet. Semifinal-ah team ṭha kan hneh a, tunah Atalanta kan hneh leh avangin champion kan phu". - Andrea Pirlo, Juventus Coach

"Kan che rang dun em em a, hun remchang kan neih ve leh kha na takin goal khung tumin kan in nawr tawn ṭhin. Goal hmaah kan vannei tawk lo a, vanneih ṭum chu ni se penalty pawh hlawh awm tak kan ni. Kan chak loh vangin a hrehawm, a pawi takzet". - Gian Piero Gasperini, Atalanta Coach