Poch hoin PSG an champion

21st May, 2021

Paris St-Germain chuan tun hnai kum sarih chhunga a vawi ruk nan French Cup an la a, manager thar Mauricio Pochettino kaihhruaina hnuaia an hlawhtlin theih nan Kylian Mbappe-a'n goal a khung bakah Mauro Icardi tan a siamsak.

Nilaini zan Stade de France-a final inkhelah Monaco defender tihsual nangchingtu Mbappe chuan keeper chauh a hmachhawn hnuah Icardi a siamsak a, Argentine striker hian minute 19-naah goal hmahruai a khung.

Inkhel thununtu PSG lamin goal an khung belh thei mai bik lo, forward Mbappe-a'n hla deuh tak aṭangin keeper Radoslaw Majecki chu mawi zetin 'chip' khum mah se goal bar a per hlauh.

Hun tawp dawnah France international hi van sen a ni lo, winger Angel di Maria-a'n player pahnih inkara a ball lirh luh chu rang taka lain, a club hlui lakah nuamsa takin goal a khung. Hrem vangin Neymar inlan lo mah se buaina an nei lo.

Kum 22 mi Mbappe chuan, "Monaco kha team ṭha tak an nih avangin hmachhawn an awlsam lo. Keini lamin kan tih tur ang chin tlin takin kan ti thei a, nomawi hlu tak kan hlawh chhuah hi a lawmawm takzet.

"French Cup hi a hlu a, Ligue 1 pawh a hlutna a nep chuang lo. Eng inelna pawh ni sa kan theihtawp kan chhuah zel ang, tuna kan hlawhtlinna hi fans tan kan hlawn," tiin a sawi a, kar tawpa league match an khelh tur a ngaih pawimawh thu a sawi bawk.

Poch-a'n PSG a enkawl tirh khan Trophee des Champions (Super Cup) a sawi tawh a, tun ṭum hi nomawi pahnih a chawina a ni. Ligue 1 title an la beisei mek bawk, an league match hnuhnung ber atan Pathianni zan hian Brest an lenchilh chhunzawm dawn a ni.

Tottenhman manager hlui Pochettino chuan, "Paris Saint-Germain te ang club lian tan chuan final-a hnehna chan hi a pawimawh a, tih ngei dan tur pawh a ni. Tuna hnehna kan chan hi Pathianni zan atan inbuatsaihna ṭha tak a ni bawk.

"Brest hneh ngei kan tum dawn a, hetih rual chiah hian Angers chuan Lille an lo chelh ngei kan beisei bawk. Midang result kan ngaihchan tel avangin a awlsam dawn lo, chutih rualin beiseina chu kan nei tur a ni, kan hna kan thawk chhunzawm ang," a ti.