Warriors ngam loh LeBron James

Hun tawp dawnah LeBron James-a'n 3-points a vawm lut a, inkhel inhnehtawk takah Los Angeles Lakers chu Golden State Warriors lakah 103-100 a hnehna chan puiin, team ṭha pariat khelh tur NBA playoff atan an tling.

Lakers hian Pathianni zan dar 1:00-ah playoff an khel zui dawn a, Western Conference table-a pahnihna Phoenix Suns nen an inkhel ang. Chak lo Golden State erawhin playoff khel phak tur chuan Inrinni zing dar 6:30-ah Memphis Grizzlies an hneh a ngai dawn.

Tun season atan bik 'Play In Tournament' an siam a, hemi hmang hian conference pahnih aṭanga playoff khel tur, seeded pasarihna leh pariatna an zawng. NBA champion Lakers hian season an hman ṭhat tawk loh avangin an inkhelh hah a ngaih phah.

Nimin zing inkhelah Warriors lam an che fuh hmasa zawk a, quarter hmasa pahnihah sang zawkin chawlhlawk an hmang. Quarter thumna bikah erawh LA lam hi point 11 zetin an sangfal zawk a, an dinhmun siamṭha zelin hun tawp dawnah 100-100 a ni.

Second 58 chauh awm tawhah James-a'n player ṭha bik a nihna a lantir a, uluk taka ven ni mah se basket pawimawh bik vawm lutin a team a chak pui. James chuan, "Vanneihna zawngin ball ka vawm phei a, chung lam aṭanga khawngaihna chu a lo thleng a ni," tiin a sawi.

GSW hi chak lo mah se an thiampuipa Stephen Curry-a'n point 37 a nei thei a, an match lehpek atan beisei an la nei thei ang. Inkhel dangah Grizzles chuan San Antonio Spurs lakah 100-96 in hnehna an chang ve bawk.