Crystal Palace-in Hodgson an thlah

Roy Hodgson-a'n season tawpah Crystal Palace a chhuahsan dawn a, Nilaini zan khan Eagles khelmual Selhurst Park-ah a tawp nan team enkawlin Arsenal leh Palace player-ten inkhelh ṭan hmain guard of honour an pe. Inkhelah erawh mikkhual Gunners 3-1 in an chak.

Palace hian season ṭha tak an hmang a, Arsenal lakah pawh point hmuh phu khawpin a khel ṭha. Gunners-in Pepe hmangin hma an hruai a, Palace tan Christian Benteke-a'n sut mah se injury time-ah Pepe leh Gabriel Martinelli ten injury time-ah an khung belh.

Goal a pawimawh
Crystal Palace-in bul an ṭan ṭha a, goal chance insiam ṭha mah se Gary Cahill leh Benteke ten an khung thei lo. Arsenal erawhin an chance neih ṭhat an hmang ṭangkai a, Kieran Tierney cross ṭha zet chu Pepe-a'n a khung.

Second half-ah Palace-in goal an khung ta a, Andros Townsend-a freekick chu dive chungin Benteke-a'n minute 62-naah a tauh goal. Belgian striker hian match li chhung goal a khung tawh.

Wilfried Zaha-a'n box chhungah ṭha takin a lalut a, Arsenal defender Callum Chambers-a'n ṭha zetin a dang. Substitute Jordan Ayew pawhin chance ṭha a nei a, a tauh nat tawk loh avangin Bernd Leno tan dan a harsa lo.

Hun tawpah Arsenal substitute-te an che ṭha a, Martin Odegaard-a cross chu goal hmaa a ngaihna hria Gabriel Martinelli-a'n a pet goal. Injury time-ah Arsenal-in hma an hruai chauh a, Pepe-a'n Palace defender ho pal darhin goal thumna a khung leh bawk.

Mangṭha Hodgson
Thawhlehni khan Roy Hodgson-a'n season tawpa Crystal Palace a chhuahsan tur thu a puang a, kum 73 mi hi Premier League-a manager upa ber a ni.

Hodgson chuan, "Hun duhawm bik ka tawng a, tun ang hun hi ka suangtuah pha lo hrim hrim. Kum nga mi ka nihin kan kawt zawl aṭangin bul ka ṭan a, kum 73 ka nih thlengin team ka enkawl. Ka chanchin hi lasi thawnthu ang mai a ni a, a nih loh pawhin Roy of the Rovers thawnthu ang deuh a ni. Hetiang dinhmun ka chang thei hi ka lawm hle," tiin a sawi.

Roy of the Rovers hi British thawnthu a ni a, a changtupa chu Roy Race niin footballer a nih hnuah manager a ni zui. Roy Hodgson hi a inkhelh hun laiin defender a ni a, Crystal Palace-ah bul ṭanin a inzirchhuahna club enkawlin a hun tawp lam a hmang.

Hodgson hian kum 1976 khan Sweden club Halmstads BK enkawlin manager hna a ṭan a, Switzerland national team chu 1994 World Cup-ah last 16 a luhpui a, Euro 1996 a khelhpui bawk. English manager hian ram pariatah team 16 a enkawl a, kum 2012-2016 chhung khan England a enkawl bawk.

Palace hian an match hnuhnung berah Liverpool an hmachhawn dawn a, Anfield-a point an hlawh chhuak a nih chuan Roy Hodgson chanchin hian sawi a hlawh phah sawt ang.