Fury-a'n Wilder-a hmachhawn dawn?

Tyson Fury chuan Anthony Joshua nena an inhnek tur tibuaitu Deontay Wilder chu sum a phut hnem avangin a hnek leh mai a ngaih tur thu a sawi a, British boxer chuan, "A lu ruhah na taka ka hnek leh phawt a ngai a nih hi," a ti!

Fury leh Joshua hi August 14-a inhnek turin ruahmanna thui taka kalpui a ni tawh a, Saudi Arabia-in a thlen tur inhnekah hian boxer pahnih hian a tlem berah pound maktaduai 100 ve ve chu an insem tura ngaih a ni.

Mahse, hetiang boruak karah hian a hneh tawh hnu Wilder a lo lang ve leh a, US dan kengkawhtu lamin Fury hi September 15 hmaa Wilder nena inhnek turin an ti.

Fury-a team-ten Joshua hmachhawn tura ruahmanna thui taka an lo kalpui tawh avangin Wilder inhnekpui tur a ruahmanna siam hi thil harsa a ni a, Fury team-te chuan Wilder hi sum pea inhnukdawk mai turin an thlem.

Mahse, Wilder hian pound maktaduai 14-a phut a, Fury-a team lamin heti zat sum pek erawh an tum lo. Wilder hian instagram lamah a trainer Malik Scott nena an training lai a pholang a, Scott chuan, "Wilder hian sum ni loin thisen a ni a duh ni," a ti a, Fury hnek chu an duh ber a nih thu a sawi.

Thawnthu inṭanna
Fury leh Wilder hi December 2018 khan a vawi khat nan an intawng a, inhnehtawkah puan an ni.

February 2020 khan a vawi hnih nan an intawng leh a, Wilder hi round sarihnaah technical knockout hmangin a tlawm.

Kum 32 mi Fury hian WBC world heavyweight title-a hlawh chhuak a, a vawi thum nana inhnek tura tih an ni. Mahse, Covid-19 leh Wilder inhliam vangin inhnek hun sawn a ngai a, hei vang hian Fury-a'n nghak thei loin Joshua lam a hawi.

Mahse, boxer pahnihin engkim an tifel dawn ta maw tihah Wilder-te an lo lang a, a chiang lo leh ta vek - hetiang boruak karah hian Joshua leh Fury inhnek ngei tur thu vawi tam lo sawi tawh promoter Eddie Hearn pawhin thil a chian loh thu a sawi ve tawh.

Joshua promoter Hearn chuan buaina chu an tan chinfel theih a nih loh thu a sawi a, Fury team-te chu an buaina chingfel turin tun kar tawp thleng hun a pe. Hearn chuan, "Fury tan hun duhawm kan siamsak a, kar tawpah chuan Fury kan hmachhawn dawn nge indawrna dang kan kalpui dawn kan hriat a ngai tawh.

"Joshua vs Fury thleng tur anga kan ngaih khan a phurawm takzet a, tunah erawh a harsa ta. Fury team-ten eng ang takin nge an fighter tan hna an thawh theih kan hre thuai ang. Fury hian Joshua a hmachhawn thei lo a nih chuan hrehawm a ti ngawt ang," a ti.

Ruahmanna dang
Hearn chuan, "Ruahmanna dang kan neih tel a ngai a, tuna kan ngaihtuahna luahtu pakhat chu WBO dan anga kan hmachhawn tur Oleksandr Usyk hi a ni," a ti a, Usyk lam an hawi ṭan.

Hetihlai hian US lama Fury-a promoter, Top Rank neitu Bob Arum chuan, "Wilder hi lo inthiarfihlim turin pawisa kan pe dawn lo a, pawisa tel loa hnawh kian mai hi kan tih dan tur chu a ni. Fury vs Joshua chu November emaw December-ah kan thlentir mai ang," a ti.

Arum chuan Las Vegas khawpuia Allegiant Stadium chu July 24-a Fury leh Wilder inhnek nan an hauh lawk tawh thu a sawi bawk a, Joshua leh Fury hian an intawn hmain fighter dang an hmachhawn leh phawt a ngai dawn niin a lang.

Chutihruala hriat tel tur chu boxer pahnih hi intawng thei lo ta se, an hmachhawn hmasak tur boxer pahnih hi fighter ṭha tak ve ve an ni a, chak lo ve thei tho an ni - Fury emaw Joshua emaw hi an tlawm a nih chuan khawvel nghahhlelh Fury vs Joshua hi a hnuah pawh a thleng lo thut thei.

Fury-a'n WBC title-a kawl laiin Joshua hian IBF, WBA leh WBO belt a kawl mek a, boxer pahnih hi an intawng a nih chuan heavyweight boxing-a title lian pali an inchuh hmasak ber tur a ni ang.

Fury vs Joshua
Khawvelin nghakhlel taka Fury leh Joshua inhnek tur a thlir laiin Wilder a lo lang a, a buai zo ta vek - Joshua a lungawi lo a, British boxer hian Fury chu na takin a dem.

Joshua chuan, "Boxing khawvel tihnualtu i ni. Fan-te lakah dawt i sawi a, intih lar nan ka hming i hmang a, fight erawh i lo duh si lo," tiin twitter-ah a ziak.

Fury-a'n Joshua puhna en liam a tum bik lo. British boxer chuan, "Tun kar tawpah kut lawngin pakhat zawk tlawm hma chu inhnek ila," a ti a, pound maktaduai 20 ve ve an hlawh tur thu sawiin a cho zui!

Mahse, Joshua chuan Fury chona hi chhangin, "I lu kawlhah ka beng ang a, engmah i ti thei lo ang," a ti! Joshua hian Fury hi Wilder nena buaina nei chunga inbiakna a lo kalpui chu a dem a, Joshua chuan, "Thubuai ngaihtuah lai a awm chuan engvangin nge khawvel hriatah kan in fight tur thu puan a nih? Engkim ziah vek a ni tawh si," a ti.

Fury chuan Joshua hi boruak sang hnuaia talbuaiah a puh ve thung a, "Wilder ka tukzal phawt ang a, kan intawng leh dawn nia," tiin a sawi - a la ngaihnawm dawn chauh.