Champions League khelh tum Liverpool

Liverpool-in season thara Champions League khelh loh an duh lo - Nilaini zan khan an mikhualna ramah Burnley chu 3-0 in an sawp a, table-ah palina dinhmun an luah ta.

Premier League-ah match khat chiah khelh tur a awm tawh a, Reds hian an match tawp berah Crystal Palace an hneh chuan season tharah Champions League an khel ang. Liverpool tan Roberto Firmino, Nathaniel Phillips leh Alex Oxlade-Chamberlain-ten goal khat ṭheuh an khung a, Burnley lamin a chhanletna tur an neih loh avangin 3-0 in Reds an chak.

February hnua a vawi khat nan Liverpool-in palina dinhmun an luah leh ta a, a zawnin match liah hnehna an chang ta - tun season-a an chak zawn rei ber ṭum a ni!

A harsa
Burnley khelmualah fans 3,000-in a hmunah inkhel an en a, West Brom laka chak tura goalkeeper Alisson-a goal khung mamawhtu Liverpool tan hna a awlsam lo.

Turf Moor-a inkhelah Burnley boss Sean Dyche-a'n fing takin 4-4-1-1 formation a rawn hmang a, Clarets (Burnley sawina) in huai takin Liverpool an nawr ngam a, an tharum an hman thiam avangin Reds-in khelh harsa an ti hle.

Fans puihbawmna nena khel Burnley tan striker Chris Wood-a phur viau a, mahse, tlarhnungah Reds tan central defender pahnih Rhys Williams leh Nat Phillips-te an khel ṭha takzet.

Minute 43-naah Liverpool fans an thaw huai a, target-a shot an neih hmasak berah tun hnaia form tak Roberto Firmino chuan an mamawh goal-a rawn khung - Firmino goal khung hma hian Thiago Alcântara leh Mohamed Salah-ten holam takin an chance ṭha neih an khawhral.

Fak tlak Phillips
Season hmasa lawkah German second division-a inkhel ve mai kha a ni a, beisei a sang lo - mahse, a khel tam tawlh tawlh a, Liverpool fan-ten Phillips ṭhatzia an hmu zel.

Goal venhim lama a thawhhlawk piah lamah Phillips-a'n goal khung tur pawhin a rintlak tih a pholang a, minute 52-naah Kop ho rilru ti hahdam lehzual turin an goal hnihna a tauh lut.

Kum 24 mi defender-in Sadio Mane siamsak tauh lut tura a positioning a ṭha a, a ball tauh luh a class viau bawk - Ben Mee-a tauh luh tur goal line aṭanga a lo tauh chhuah hmante chu a 'positioning' dik vang tih loh rual a ni lo.

Hun tawp nan minute hnih chiah a awm tawh a, minute 81-naa luhtir Ox-a hun a her chhuak - nipui transfer-a chhuak tur anga sawi midfielder hian a dam ṭhat phawt chuan game thlak danglam turin a la ṭha tawk tih a pholang a, ṭha zetin chak nemnghehna goal-a khung.

Hmabak chu
Season tawp lamah Liverpool-in an huaisenna an pholang a, season thara Champions League khel turin an dinhmun a ṭha ta hle - May 23 zanah Crystal Palace an mikhual dawn a, an chak chuan top four-ah season an khar ang.

Liverpool vanneihna pakhat chu an match tawp ber an khelmuala an khel tur hi a ni a, fans-in inkhel an en leh theih tak bawk avangin mi 10,000 zetin a hmunah inkhel hi an en dawn.

Kop tel chunga Anfield danglamzia hrechiangtute chu Premier League club-te bawk an ni a, fan-ten Champions League an mitthla fel leh der tawh ang.

Liverpool hian pathumna Chelsea chu point khat lekin an phak lo a, Blues hian an match tawp berah Aston Villa an lenchilh dawn. Leicester City chu Liverpool nen an point hmuh zat inang mah se goal difference-ah an hniam avangin pangana an ni a, an match tawp berah Tottenham Hotspur an mikhual dawn!

"Semifinal khel ang kan ni a, chak kan mamawh ang ngeiin kan chak bawk. Engmah a la chiang lo a, chutihrual chuan hma kan sawn a, final kan lut ta - kan khelh ṭhat avangin kan phu em em bawk. Tuna kan tih tur chu insiamrem vat a ni a, position ṭhenkhatah kan squad a chhah lo em em a, dimdawi taka kan inenkawl a ngai a ni. Anfield-a fans 10,000 an lo kir tur hi ka nghakhlel takzet a, chuhtihrual chuan Palace ṭhatzia kan hria a, engmah a la chiang lo". - Jurgen Klopp, Liverpool manager