Covid-19 vanga buai River Plate an chak

River Plate-in coronavirus vangin player 20 an chhawr thei lo a, player 11 chauh khelh tur neiin Copa Libertadores-ah Santa Fe an hmachhawn a, 2-1 in hnehna a chang.

Argentine club player 20 zetin Covid-19 an vei a, group D inkhela Santa Fe an hmachhawn ṭum hian keeper pali chu coronavirus vangin an inlan thei lo. River Plate hian keeper dang pahnih dah belh an dil a, phalsak an nih loh avangin midfielder Enzo Perez-a'n goal a veng hial.

Copa Libertadores hi Europe-a tlukpui chu Champions League a ni a, Argentine club hian Colombian club lakah hian Fabrizio Angileri leh Julian Alvarez te hmangin 2-0 in hma a hruai a, Kelvin Osorio-a'n sut ṭhen mah se 2-1 a hnehna an chan avangin an group-ah hmahruaitu an ni.

Enzo Perez hi Argentina-in 2014 World Cup final an thlen khan bul a ṭan pha a, kum 35 mi chuan, "Goalkeeping coach te thurawn angin penalty spot kha ka awmna hmun siam dik nan ka hmang," tiin a sawi.