Wimbledon entu an tam beisei

Tennis inelna ngaihhlut Wimbledon chu a hmunah entu an awm thei dawn a, tournament buatsaihtu lam chuan tun ang zela hrilengin ziaawm lam a pan a nih chuan stadium chhungah 25% aia tam an luh theih an beisei.

Britain ramah hian infiamna hmunah entu an awm thei leh ṭan tawh a, an beisei dan chuan June 21 aṭang chuan entu tam zawk an awm theih a rinawm - Wimbledon hi June 28 aṭanga khelh tur a ni ang.

Nunphung pangngaiah chuan Wimbledon hi ni khatah mi 42,000 velin an el ṭhin. Nikum khan hrileng vangin inelna hi neih theih a ni lo, tournament khelh hnuhnung ber 2019 khan ni 13 chhungin a hmunah mi 500,397 lai an pungkhawm.

All England Club chuan thu chhuah siamin, "Ticket tam zawk kan hralh thei ngei ang tih kan ring nghet tlat a ni. Infiamna bakah punkhawmna dangte pawh neih theih ṭan a ni tawh, chuvangin chanchin ṭha lam kan tawn zel kan beisei," tiin a sawi