Federer hnung zui tur Stricker?

Swiss mipui ten hun rei tak chhung chu Roger Federer leh Stan Wawrinka an ṭan ngawr ngawr a, tunah chuan ṭan tur dang an neih belh dawn niin a lang - Dominic Stricker lakah beisei an nei sang hle.

World number 419 chauh ni mah se tun hnaiah Stricker a khel ṭha. Geneva Open khelh laiah Stricker hian US Open champion hlui Marin Cilic a vaw tla tawh a, Nilaini zan khan Marton Fucsovics chu 7-5, 6-4 a hnehin quarterfinal a inhlangkai.

Kum 18 mi Stricker chuan, "Tun dinhmunah chuan thil engkim mai hi ka duhdan in a kal vek mai emaw tih tur a ni. Service bakah ball vuak dangte pawh a ṭha vek a, tun hnaiah hian nasa takin hma ka sawn.

"Mi ṭhenkhat chuan player ropuite nen min lo khaikhin fiam ve tih ka hria, a lawmawm rualin a zahthlak. Kei chuan a bul ka ṭan ve chauh a ni a, kawng zawh tur thui tak ka la neih avangin engmah sawi lawk ngam a ni lo," tiin a sawi.